الثلاثاء، 6 أكتوبر 2009

ما يقع إلا التنك.....


زماااااااااااااان كدة من سنتين ونص أنا كنت بشتغل في شركة تيم شير يعني المشاركة بالوقت أو شركة تسويق سياحي عقاري اللي هما بيسوقوا قرى سياحية ومعظم الناس بتقول عليهم نصابين الله يمسيك بالخير يا ممكن..
ومحدش يقول يا نصااااااااااابة..!!!!

في الشركة دي كنت بشوف العجب ولا الصيام في رجب .
كل يوم عميل جديد وحكاية جديدة وروايه جديدة وحرقة دم جديدة.

الشغلانة الوحيدة اللي ملهاش علاقة بالروتين وبنلون جلدنا فيها كل يوم زي التعابيين حسب نوع العميل
انبارح دكتور انهارده سواق بكرة مدرس بعده جزار
وكل يوم لدينا كل ماهو جديد وكل ما هو عجيب
انبارح بخيل انهارده عينه زيغه بكرة واحد تنك ومغرور وهكذااااااااا
هحكيلكوا بقى على التنك اللي شايف نفسه المغرور اللي وقع في نص هدومه وضحك الناس عليه.
إحنا كنا بنستقبل العملا بتوعنا في قاعة كبيرة فيها 12 طربيزة كل طربيزة عليها أسرة ومندوب أو مندوبة مننا....
يا عيني من حظه النحس اننا كان عندنا في الشركة في اليوم ده عملا بالهبل
يعني القاعة مليانة على اخرها ناس غير المندوبين ومديريين المبيعات.....
وكنت انا قاعدة في الطربيزة التانية ورا الطربيزة اللي قاعد عليها اخينا التنك ده وكان معايا اسرة بيئة ومطلعين عيني ومكنتش طايقة نفسي ساعتها.
اخينا ده كان طويييييييييييييييييل وعرييييييييييييييييييييض جسم جسم يعني يشبه طرزان بالظبط ههههههههههه انا مش بنم انا بوصفلكوا الوضع بس
وكان جاي مع باباه ومامته وكانوا ناس عواجييز أوي بس شكلهم ناس نضيفة جدا

وكانت قاعدة معاهم مندوبة زميلتنا كانت اقدم واشطر مندوبة مبيعات عندنا في الشركة.
المهم طول ماهما قاعدين يا عيني معصبينها والبنت فضلت مستحملاهم ومستحملة غلاستهم.
و أخينا ده قاعد ومتنك أوي على الكرسي وحاطت رجل على رجل ومرجع ضهره لورا ومش مهتم بالعرض خالص وده طبعا ممنوع جداً في شغلنا.
وزميلتنا دي اتحايلت عليه ينتبه لكلامها وللعرض بتاعها برضو مفيش فايدة
البت بصيتله والدمعة هتفر من عينيها ولسان حالها بيقول روح يا شيخ ربنا ينتقم منك

وكانت القاعة متبلطة سيراميك ناعم جدا والكراسي كانت بلاستيك وبتفرش على البلاط يعني ماينفعش حد ضخم يقعد عليها ولا حد يتنك عليها .... نعمل ايه بقى للمدير البخيل!!!

وفي ظل المعمعة والدوشة والهيصة والحر والعصبية والميوزيك الاجنبي العالي جدا

فجاة ....وبدون سابق انذار
بوممممممممممممممممممممممممممم......
سمعنا صوت مدوي كانه صوت انفجار قنبلة عنقودية
توقف الصراخ والضجيج وجميع الاصوات والقلوب وقعت في الرجول من الخضة واتجهت الانظار كلها ناحية الصوت....
لقينا اخينا ده ممدد على الارض بطوله ده وعرضه ده ولقينا الكرسي كانه اتنسف من على الارض وعبارة عن اكثر من مليون جزء منثورة في القاعة كلها.

هههههههههههههههههه ههههههههههههههههههه هههههههههههههههههههه
ضحك ضحك ضحك ضحك ضحك الى مالالالالالالالالالالا نهاية
ومديرين المبيعات جروا بسرعة جدا عليه ووقفوه وهما مسخسخين من الضحك

وباباه ومامته وقعوا على الارض من كتر الضحك
والأسرة البيئة اللي كانوا معايا فطسوا من الضحك
وأنااااااااااااااااااااااااااا نزلت تحت الطربيزة ومقدرتش امسك نفسي من الضحك وفرحت موووووووووووووووت لاني كنت حاسة بزميلتي وشايفة الوضع من الأول
أخينا ده بقى وشه بقى أحمرررررررر وودانه بقت حمرااااااااا وقام جري وأخد بعضه وعلى برة زي الصارووووخ ولم نعد نراه مرة أخرى.

ومن يوميها كل لما افتكر الموقف ده مقدرش أمسك نفسي من الضحك
مع أن الموقف ده اتكرر بعدها كتيير مع ناس تانية بس ده اللي أنا ضحكت عليه من قلبي بجد هبلة بقى ومسكوها طبلة ههههههههههههه

كنت قاعدة بقى في رمضان اللي فات ده مع نفسي كدة وافتكرت الموقف ده فضلت اضحك جدا وبصوت عالي لقيت امي بتقولي في أيه يابنتي بتضحكي كدة ليه هو انتي اتهبلتي قولتلها لا مفيش بس افتكرت موقف الراجل اللي اندلق على الارض لما كنت بشتغل في شركة السياحة طبعا انا كنت رجعت البيت وسيحتله فضلت تقولي حرام عليكي مسيرك توقعي نفس الواقعة
وزي ما تكون أبواب السما كانت مفتوحة وهي بتقول
تاني يوم نزلت رحت الشغل بتاعي وكنت لابسة شوذ كعبه عالي ورفيع
وأنا راجعة من الشغل بقى الساعة اتنين الضهر رايحة متجهة للموقف بتاعنا علشان أركب وماشية بمنتهى التناكة وكمان سرحانة فجأة وبدون أي سابق إنذار لقيت رجلي اتلوت تحتي ووقعت بشكل غريب ولقيتني ممددة على ضهري على الأرض وأمة لا إله إلا الله في المكان وقت رجوع الموظفين من شغلهم بقى
طبعا متخيلين الموقف
ولقيت الناس جروا عليا والحق يا جدع وشيل يا جدع
واختكم بقت في ربع هدومها وأنا حساسة موت بقى ومش بحب أتعرض للمواقف دي ( وش مكسوف)
الستات شالوني وقوموني واللي ماسكة ايدي واللي جابت شنطتي من على الأرض وأنا حسيت إن الدنيا لفت بيا والدموع غرقت وشي من الكسوف ومن الوجع وكنت شايفة الناس مشوشين جدا وكان نفسي وقتها الأرض تنشق وتبلعني
مقدرتش أدوس برجلي على الأرض لأنها اتجذعت وفوقت على صوت الست بتقولي أيه ده الحقي ..... دم!!
ببص لقيت رجلي اتعورت والدم غرق الرصيف
كل ده مهمنيش قد كسوفي وشكلي وبرستيجي اللي اتبعتر على الأرض خصوصا وأنا كنت ماشية بكل تناكة واندلقت بالشكل ده
وأول توكتوك وصل للموقف أخدته وجري على البيت كل ده وأنا بعيط وبتذكر الموقف من أوله
وأول ما وصلت البيت لقيت ماما بتقول أهي القمر وصلت أنا مابتسمتش ليها ولا حاجة فحست ان في مصيبة حصلت ولقت عنيا مليانة دموع قالتلي مالك أيه اللي حصل
اتفتحت في العياط من تاني وحكيت ليها الموقف فضلت تضحك قالتلي ولا يهمك ما يقع إلا التنك بس أخدت تريقة من البيت كله لمدة كام يوم خصوصاً وأنا قبلها بيوم الشوذ بتاعي اتسرق في المسجد وأنا بصلي التراويح وعديت على واحدة صحبتي ساكنة قريب من المسجد استلفت منها شوذ علشان اروح بيه وعلشان الاحراج بتاعي يزيد كمان قالتلي هو انتي مش بتفتكريني ولا تفتكري تزوريني غير لما الشوذ بتاعك يتسرق قولتلها بكل بجاحة اه وغير كدة مكنتش هاجي ولا هشوف وشك والبلد كلها عرفت ان الشوذ اتسرق مني في المسجد ولحد انهارده كل اللي تشوفني من الستات اللي كانوا في المسجد يوميها تقولي هو انتي معرفتيش مين اللي سرق الشوذ بتاعك؟؟؟ احراج احراج احراج


أهي دي أخرة التناكة بقى ومايقع إلا التنك!!!!!

هناك 86 تعليقًا:

Che يقول...

هههههههههههههههههههههههههههه ..... هههههههههههههههههههههههه ..... مش قصدى الضحك والله .... بس مش قادر امسك نفسى .... صحيح ... كله سلف و دين حتى المشى على الرجلين ..... سيبك ان الواد كان يستاهل .... بس ده يعملنا درس مهم .... اننا مش مانتريقش على الناس .... لا نتريق و نتريق أوى .... بس مانمشيش بشوذ كعبه عالى و رفيع ..... معلش بأه يا زهور تعيشى و تاخدى غيرها

حاسوباتيه يقول...

هههههههههههههههه الي يتريق على حد في حاجه بتحصله نفسها ههههههه مايقع الا التنك فعلا خلي بالك بقى بعد كده

الا قوليليصحيح ماعرفتيش مين سرق الشوز بتاعك؟
ههههههههههههههه

الشعب لابد له من حكومه تشكمه يقول...

اسسسسسسسسسسسسسكتى متفكرنيش انا تخصص وقعات:( مع انى مش بتريق على حد والله.
يلا بالشفا تعيشى وتاخدى غيرها

------ يقول...

ههههههههههه

يمهل ولاااااااايهمل :)

تعيشى يارب ومتاخديش غيرها تانى

لان اكييييييييييد اتعلمتى هههههههه

أبو كريم يقول...

أولا السلام عليكم

إزيك يا بلدياتى... على فكرة انتى وقتى لانك كنتى بتضحكى بشماته..مش بس لانك مقدرتيش تمسكى نسك من الضحك

أنا المواقف دى بتحصل معايا كتير وزى ما قولتى ما يوقع الا التنك

والمواقف المحرجة دى وربنا بتعلمنا اننا ما نتغرش او نتعالى

تدوينة رائعه

دمت بكل الخير

romansy يقول...

ههههههههههههههه
بقى انتى مستينه التنك يقع اديك وقعت
وفى الشارع مش فى القاعه
دى هتلاقى عوضين ومحمدين
وكل البشريه الكرام اتفرجوا
على زهور الامل وخدوا الامل منها
هههههههه
بس اقولك حاجه
انتى دمك خفيف

ياريتك بقى كل مره تحكيلينا مواقف من دى كتير

هيثــم رمضـــان يقول...

ههههههههههههههههههههه

الله يحظك يا زهور والله ما كنتش أعرف إن دمك خفيف كده وعلي فكره أسلوبك جميل جداً في الكتابه بالشكل ده علي فكره ممكن تتخيلي أحداث مشابهه وتكتبيها بنفس الشكل وهتبقي حلوه قوي , وده درس علشان ما تتضحكيش علي حد تاني وشكلك كنتي ظلماه وهو لا تنك ولا حاجه بس في ناس بيبقي شكلها كده وكمان هو ما كنش مهتم بالعرض لانه كان متأكد إن إنتو نصابين هههههههههههههه

تحياتي

حياه بلا عنوان يقول...

هههههههههه
ربنا يعينك يارب بس مش تعيشى وتخدى غيرها ابقى خدى بالك بعد كده بقا
ربنا سترها المره دى ههههههههههه ياعالم المره الجايه تكون ايه
تحياتى

هيفاء عبده يقول...

اولا الحمدلله على سلامتك هههههه يااحلى زهرة
ثانيا ..سردك للقصة ممتع للغاية ..ليه ما تفكري تكتبي قصص قصيرة ..فكرة صح ؟
ثالثا ..حطي نفسك مكانه ..حراااام
بس الفرق بينك وبينه انه هو ضحك عليه كل الي حوليه ..
لاكن انتي الناس على الاقل اتعاطفت معاك وساعدتك

الله يغفر لنا ويرحمنا ..

دمت بود

Yusuf يقول...

فعلا ما يقع الا التنك

بس ايه حكاية سرقة الجوامع دي

انا حصلت معايا مرة واحدة

وللأسف كان عندي عزاء بعد الصلاة علطول

من ساعتها بحط الكوتشي بتاعي بين رجليا وانا بصلي

واللي مش عاجبه يقف يحرسه هو

حتي السرقة ف بيت الله

وبعد كده بلاش الكعب العالي

وبلاش تمشي بتناكة

تحياتي

MOHAMMED ELBANNA يقول...

اوراق الورد
موقف طريف وفعلاً ما يقع الا التنك
معلهش اللي حصل
تقبلي تحياتي
محمد البنا
طريق النجاح

micheal يقول...

ههههههههههههههههههههه...مش عارف ليه كان عندي إحساس أن كتر الضحك ع الواد اللي وقع حيرتد عليكي بموقف
:)
وقد كان
يلا تعيشي وتأخدي غيرها
تحياتي

top-fn يقول...

ههههههههههههههههههه

لا جميل عرضك للموضع

رائع جدااا شكرا ليكي

عشان مش تتريقي ع حد بعد كدهـ ههههه

مش فرحان فيكي طبعااا :D

ادم المصرى يقول...

يلا كما تدين تدان

ابقى خلى بالك بقه

ابقى قولى بعد كدا

الحمد لله الذى ميزنا بكثيرا عن عباده

سمكه واحده يقول...

ههههههههههههههههههههههه
انا بقي بضحك عليكي انتي
(وش مطلع لسانه)
لا بجد اصلك فكرتيني بحجات كتير كانت بتحصلي لو حكتهالك مش هنخلص وحجات بجد كانت بتموت من الضحك ومواقف كتير وكنت بتعامل معاها بعصبيه ونرفزه تموت من الضحك يمكن في نص نرفزتي تلاقيني اضحك مجنونه مجنونه مقولكيش
وعيبي بقي التريقه بس والله بحاول متريقش علي حد بس غصب عني مقدرش اشوف حاجه ومعلقش عليها
يمكن اللي بيخفف موقف كسوفي لو حصلي حاجه اني اتريق علي نفسي واعلق واخلي اللي جمبي يموت من الضحك واضحك وبتعدي
سيبك انتي يا بت يازهور متتريقيش علي حد تنك تاني انا بقلك اهو
عامله ايه
ولقيتي صحيح اللي سرق الشوز؟
اهو الموقف ده ديما بفكر فيه واقول ياتري لو اتسرقت همشي ازاي وانا معنديش اصحاب قريبين من مساجد كتير بروحها اصلي بصيع في اماكن كتير
هسكن كل واحده قريب من مسجد بقي!
ياله خير
متتأخريش علينا في البوستات تاني

صفــــاء يقول...

يا زهور يا جميييله
معلش ياختى
انشالله الناس الوحشيين
بصى انا ضحكت على الموقف اللى انت قولتيه فى الاول على ضحكك وطريقتك فى الحكى
بس زعلت عشانك
مش عشان وقعتى لا ما يقع الا الشاطر انا زعلت على جرحك
يا رب يكون خف ووتكونى بقيتى بخير
وربنا يعوض عليكى فى الشوز يا جميله

بجد بجد طمنينى عليكى

حـــــــــــب الملائكه يقول...

السلام عليكم
يااااااااااه
جميل جدا البوست ده
بس تعرفي
كله ها ها ها ... اكمل ... بلاش
تعيشى يارب ومتاخديش غيرها تانى
سلام
الجزاااااااااار
FAYHI

هنا تسكن روحي يقول...

السلام عليكم ورحمه الله
ربنا سبحانه وتعالي قال:
"ولا تمش ف الأرض مرحاً إن الله لا يحب كل مختال فخور" -سورة لقمان,الأية 18-
صدق الله العظيم
مشكلتنا إننا فصلنا بين الدين والدنيا من قرون , وأصبح كل واحد ربنا أنعم عليه بنعمه يتكبر ويتعال علي الأخرين بدل ما يشكره ويحمده علي ده دا بالنسبة لأخونا التنك.

أما بخصوص وقعتك المدوية علي سطح الأرض الصلب , فأنا أسفت لها كثيراً فلاً منظر صعب جدا علي أي حد سواء اللي وقع أو اللي شاهد الواقعة
وبما إني Science Teacher والحمد لله فأنا بصيت لوقعتك بمنظور مختلف إسمحيلي أوضحه :)
تبعاً لقانون نيوتن الأول وتفسيراتها المممله إن الأجسام أو أي كائن حي ينجذب بفعل الجاذبية الأرضية في حالت إذا كانت الجاذبية الأرضية أكبر من القوة الطاردة المركزية للجسم الأخر
وبم إن ده صعب شوية مع حالتك
يبقي التفسير الجديد لقانون الجاذبية لنيوتن هو إن جاذبية الأرض لم تتزن مع جاذبيتك فبالتالي ذادت جاذبية الأرض من شدها إليك
وبكده يكون ده التفسير العلمي للحادثة
بس المهم
الحمد لله علي سلامتك , وتسمعي كلام ولدتك ههههههههههههه
تحياتي لك ولمدونتك الجميلة
دمتي بالصحة والخير والسعادة

maha zein يقول...

ادي اخرة التناكة
يا ناس يا تنكة

متخيلاكي والله ماشية كده و متعنتزه و ايز فجاة امه لا الله الا الله جاية تحمل و تشيل

اصل اختك حصلها نفس الموقف
بس انا للأسف محدش شالني
انتي لقيت اللى ينقذك ويشيلك الشنطة
انا الكل هجرني و خاف يلمس وبدل ما يقولوا شيل يا جدع
يقولوا اجري يا جدع


بقولك ايه تعيشي و تتنكي
هنعمل ايه يعني محدش بيتنك بالساهل

يلا روحي كده عشان اشوف ايه موضوع الخيانة ده
احنا فينا من كده

akeed يقول...

ههههههههههههههه

موقف ظريف فعلا

تحياتى على المدونة دية اول زيارة للمدونة

المسلم الصغير يقول...

ألف حمد الله على سلامتك يا جميل....
ومش هقولك تعيشي وتأخذي غيرها ويا رب تكون آخر الوقعان والتناكة برده .
والله لا شماته وربك ما بيسيبش يمهل ولا يهمل وعلى فكرة الكب العالي حرام
بس بجد أنتي أضحكتيني كثيراً وأسلوبك جميل جداً وبعد كدة أبقي دخلى الشوذ بتاعك جوة في الجزامه في الجامع وأبقي خدي بالك بعد كدة وأنتي ماسية
ودومتي بألف خير وسلامة

المسلم الصغير يقول...

على فكرة انا نزلت حاجة جديدة عندي وأتمنى أن تزورينى

د/ أحمد لاشين يقول...

يعني لسه هنتريق علي خلق الله ؟؟؟
والا حرمتي !!!
الف سلامة عليك
ربنا يكرمك
ويجعل لك في كل خطوة
سلامة
وسعادة
وعبادة
واثر لطاعة يفرحك يوم القيامة

mimi يقول...

بصراحة ... عندي تعليقين

الأولاني والتاني ( أنتي ونصيبك بقي لو حصلهم تكاثر)

ههههههههههههه

التعليق الأولاني من ميمي : -

انه لايسخر قوم من قوم عسي أن يكونوا خير منهم ... انتي فاهمة طبعا .. ولو مقدرناش نمسك نفسنا من الضحك ... نمد إيد المساعدة حتي لو بنضحك علشان المواقف في الدنيا دوارة ... يعني اللي بيحصل لغيرك بكره يحصللك

mimi يقول...

أما التعليق التاني فبرده من ميمي ( أيون أنا برده )

أنا بقي حصلي مواقف أنيل من كده ... وإحراج لا يوصف علي صفحة مدونة

وصحيح .. عرفتي اللي سرق الجزمة بتاعتك؟

ههههههههههههههههه

هاني مهران يقول...

لابسة كعب عالى ..وتقعى ..(الشوز) يتسرق فى الجامع كنتى شغالة فى السياحة ؟؟!!!!!!!!!!!!!

ما علينا

انا موظف مؤقت..وكنت شغال قبل كدة تسويق فى شركة سياحية..واتسرق الكوتش بتاعى وانا بصلى ..بس انا مش بلبس كعب عالى عشان اقع


انا جاى اقولك انها تدوينة كويسة


تقبلى مرورى

الحــ ــزين يقول...

الحــ ــزين
هههههههههههههههههههههههههههههههههههههههههههههههههههههههههههههههههه
كل دا علشان بتشمتى فى الراجل التنك اللى انا كمان شمت فيه
انتى اتحطيتى بسرعة فى الموقف زيه ..والحق يجدع هاااااااا والله انتى زى العسل بس لو انا كنت شفتك مش كنت هاشيلك كنت هاضحك..
انا بهزر دومتى سعيدة

الست فرويد يقول...

ههههههههههه

والله انت دمك زى عسل

ضحكتنى جدا

:))))))

حياتى نغم يقول...

السلام عليكم ورحمة الله وبركاته

أضحك الله سنك :)
معلشى ما يقع إلا الشاطر :)
إن شاء الله تكون آخر الإحراج .

بنت الأسلام يقول...

أسفة للتعليق خارج الموضوع
توفى إلى رحمته الله تعالى والد المدون (أبو صهيب ) تغمدة الله برحمتة واسكنة فسيح جناتة.
فى ختمة فى مدونة أبو صهيب أرجو المشاركة بها
http://miikha.blogspot.com/

محمد عبدالرحمن شحاته يقول...

ههههههه
بوست جميل جداً
صحيح
كله سلف ودين
تقبلي مروري

momken يقول...

هههههههههههه

حلوة اوى الحكايه دى عمرك ما حكتيلى عنها.....انتى مش بتحكيلى الا عو الحجات الى تزعل ولا ايه؟


متخيلك وانتى واقعه على الارض والناس عماله تقومك

وكمان عارفه لما بتجيلك هيشتريه ضحك
بس استغربت انك عيطى
الى انا اعرفه انك كنتى ممكن تضجكى على روحك فى الموقف ده

عارفه

انا كمان حصلى موقف فوف الفظيع
كنا فى رمضان...وده من رمضانات القليله الى بقضيها فى مصر
وكنت معزم على الافطار فى فندق خمس نجوم
الفندق قريب من بيتنا علشان كده قبلت العزومه

المهم وانا رايح على الفطار الناس مستعجله وبتجرى وانا عمال اقولهم على مهلكوا فيها ايه يعنى لو اكلنا متاخر خمس دقايق مش هنموت

المهم وصلت ونزلت وناس اخدت العبيه تركنها
وانا نازل من العربيه زى الفل
ودخل على الفندق

وفجأه صمعت طااااااخ صوت عالى اوى لسه مستوعبتش ايه الصوت ده

فجأ لقيت وشى ومناخير وشفايفى وسنانى بيوجعونى

انارى اللوبى بتاع الفندق بيفرق بينه وبين باب الاستقبال ازاز
بس ازاز ايه نضييييييف اوى لدرجه صعب حد يشوفه
وانا بجلاله قدرى لبست فى الازاز ده بكل جسمى
طاااااااااااااخ

لاقيت كل الناس فى اللوبى بتبس عليا وكلهعم بيودوا وشهم الناحيه التانيه علشان مش عارفين يمسكوا روحهم من الضحك
وعلشان يحافظوا على مشاعيرى واحاسيسى

الغريب ان انا مع خجلى الشديد جداً وكسوفى الجامد من الموقف الا انى مقدرتش امسك نفسى من الضحك

ورحت الريشيبشن اسال عن مكان القاعه الى فيها الفطار موضفه الاستقبال برضو مش قادره تسيطر على روحها من الضحك
وانفجرت من الضحك زياده لما انا قولتها: ماسكه نفسك ليه اضحكى اضحكى

وقالتلى على مكان القاعه ورحت عليها وانا فى الطريق للقاعه كا ما افتر اضحك واحاول اسيطر على ضحكى

ولما وصلت بيقوليلى ايه ياعم الى اخارك قلتلهم اصل فى واحد معرفوش اتخبط فى الازاز


--------

البوست بتعك عسل اوى
ودمك خفيف اوى يخرب عقلك وبعدين تعالى هنا...هو انا قلت ان التايم شير ده نصابين
ابداً ابداً محصلش بتا تاً

دول حراميه حراميه حراميه
ال نصابين ال ..دى النصابين شرفا بالنسبه ليهم

ايه ارغى ده كله استحملى بقى


تحياتى

رابطة هويتي اسلامية يقول...

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية

شوية قهوة يقول...

ههههههههههههههههه
كدة غلط الترقة ممنوعة
وبعدين ممكن ربنا يخلنا مكانوا
ههههههههههه
بس خلاص بلاش تريقة

غير معرف يقول...

بوست دمه خفيف اوى

sweet angel يقول...

ههههههههه
جميله مدونتك
من تواضع لله رفعه
أسلوبك كمان جميل
وتعيشي ومتاخديش غيرها ان شاء الله
تقبلي اول مرور لي بمدونتك
تحياتي

شريكة في المطعم يقول...

ههههههههههههههههههههههههههههههههه
اهم حاجة التناكة دي ..والبرستيج والواحد يعيش في الدور ههههههههههههه
لا بجد بتبقى مواقف محرجة جدا
بس شوفتي العيلة البيئة ارحم من التنك
;)
لكن الصراحة حلو الشغل الي كل يوم فيه جديد ده ..احسن من الروتين

مستنيين بوست جديد

Magia da Inês يقول...

Olá amiga!
Conheci seu cantinho... muito lindo!
Um ótimo fim de semana!
Beijinhos.
Brasil

مدحت محمد يقول...

وادى اخرة التريقة

مهاجر فى وطنى يقول...

السلام عليكم
بجدبوست رائع انا بصيت على الكرس الى انا قاعد عليه خفت اكون متنك ولا حاجه
بيتهيقلى العميل الى وقع ده حرم يدخل شركتكم تانى

تشرفنى زيارتك

زهور الامل يقول...

che

هههههههههه لا اضحك اضحك يا عمرو ومتحرمش نفسك من حاجة
بس برضو مش قادرة ابطل تريقة على الناس ولا قادرة ملبسش كعب عالي
حكم التعود بقى

منورني يا باشا

زهور الامل يقول...

حاسوباتية

والله يا حاسوباتية ما اتريقت عليه انا ضحكت بس زي كل اللي موجودين ما ضحكوا
مش معقول يعني الكل هيضحك وانا هكشر
والواحد اليومين دول بقى ما بيصدق انه يشوف حاجة تضحكه

بس والله لو كنتي شوفتيه وهو قاعد متنك ومتكبر كنتي هتفرحي فيه برضو

وبالنسبة بقى للشوز (وش زعلان) ربنا يسامح اللي أخدته اصله كان لسة جديد وعليه فصوص بتلمع هههههه

منوراني يا قمر وخلي بالك من شوذك

زهور الامل يقول...

الشعب لابد له من حكومة تشكمه

والله الوقعات دي تخصصي أنا بس دي اكتر واقعة اثرت فيا أوي وكسفتني

يلا بقى أعيش ومأخدش غيرها ههههههههه

منوراني وشكرا على الزيارة

زهور الامل يقول...

دموع القمر

ازيك يا اجمل قمر من غير دموع

أنا اه اتعلمت بس اتعلمت حاجة تانية خالص اني ملبسش كعب عالي تاني
لكن التريقة بصراحة مقدرش دي حاجة غصب عني ومش بايدي وكل واحد يخلي باله بقى من روحه ومايفكرش يقع قدامي ههههههههه

منوراني دايما

زهور الامل يقول...

أبو كريم

أزيك يا ابو كريم
والله أنا ضحكت عليه للسببين
علشان شمت فيه لان فعلا كان اسلوبه مستفز وكان متكبر جدا وعمال يبصلنا بقرف
وثانيا لان بجد شكله كان يضحك وهو واقع على الارض والكل ضحك مش انا لواحدي

منورني جدا

زهور الامل يقول...

romansy

ماااااااااشي يا عم الرومانسي
اضحك اضحك
بقى هما اخدوا مني الامل وانا أخدت منهم الاحراج هههههههههه

والله انت اللي دمك سكر
وبعدين حاضر يا سيدي هحكيلكوا كتير على مواقفي اللي بقع فيها كل يوم علشان تشوفوا العجب

منورني اوي اوي

زهور الامل يقول...

هيثم رمضان

أهلا أهلا بالباشا اللي بينورنا بكلامه الجميل
والله انت اللي دمك عسل
اسكت يا استاذ هيثم ده كان موقف رهييييييييب فضلت بعدها يومين مكتئبة ومش عايزة اروح الشغل
ولحد انهارده كل يوم وانا راجعة ابص للحتة اللي وقعت فيها وامشي بشوييييييييييش
اللي يتلسع من الشربة بقى

منورني جدا

زهور الامل يقول...

حياة بلا عنوان

المرة الجاية
هو لسة في مرة جااية
ده انا روحت يوميها مسكت شوذ من اللي عندي وديته للجزماتي قص كعبه
وبعد كدة هحاول البس كعب مش عالي بس ادعيلي اني اقدر

ربنا يخليكي على دعوتك الجميلة يا قمر

تحياتي

زهور الامل يقول...

هيفاء

ازيك يا ارق واجمل هيفاء في الدنيا

الله يسلمك يارب من كل شر

متشكرة اوي على رايك أنا فعلا بعشق القصص القصيرة بس بخاف اني مقدرش اكتبها بالشكل اللي يليق بقرائي الجمال اللي زيك

بالنسبة للواقعة بقى والله هو كان شكله مستفز جدا ومتكبر وبيبصلنا كلنا بقرف وتناكة
وكمان كل القاعة ضحكت عليه مش انا بس

يعني الكل يضحك وانا اكشر؟

ربنا يستر علينا من الوقعات تاني

منوراني بزيارتك الجميلة دايما

زهور الامل يقول...

yusuf

ازيك يا يوسف

والله انا الشوذ فضل يتسرق منه فرد كل يوم لمدة خمس ايام
وكنت انزل الاقيها مستخبية تحت بير السلم
اخر يوم بقى الشوذ كله اتسرق وادور في سلقط وفي ملقط ملقيتوش

ومن بعدها حرمت ادخل المسجد ده تاني

بالنسبة للعكب العالي والله غصب عني ده تعود وكمان انا مش بمشي بمياعة انا مشيتي زي الظباط بالظبط

منورني جدا

زهور الامل يقول...

mohammed elbanna

اهلا اهلا يا محمد
متشكرة جدا على زيارتك ليا
وان شاء الله نتواصل

تحياتي

زهور الامل يقول...

micheal

ههههههه ماش ماشي يا مايكل اضحك عليا اضحك

مسيرك تتزحلق مرة وانت نازل من على سلم اي انترفيو من انترفيوهاتك العجيبة
ههههههه لا طبعا بعد الشر عنك

منورني يا باشا

زهور الامل يقول...

عمرو

ازيك يا عمور

متشكرة اوي ليك على رايك وعلى الزيارة

وبالنسبة للتريقة بقى ده طبع ومش قادرة اغيره
لالالازم ولابد وحتما اتريق
هههههههههه

منورني

زهور الامل يقول...

ادم المصري

ازيك يا ادم
هو فعلا كما تدين تدان
بس هو كان شكله وتكبره مستفز
والكل ضحك عليه
معقول الكل وقع زيي

يلا اعيش واخد غيرها هههههههههه

منورني يا ادم

donya يقول...

اول زياره للمدونه

ضحكتيني فعلا
موقف يفطس من الضحك فعلا
اهو خد مايستحقه
بس صحبتك المندوبه دي سرها باتع اوي
خاليها تدعي لنا

بوست جميل

*تحياتي

جارة القمر يقول...

تعرفي صعب عليه

بجد الموقف محرج جدا

بس أسلوبك تحفة وبيدخل للقلب بسرعة

فعلا انتي رائعة


شكرا لسؤالك عني حبيبتي

ربنا مايحرمنيش منك يارب

لو عرفوه هيحبوه يقول...

السلام عليكم ورحمه الله وبركاته

اسال الله ان يوفقك لكل ما يحبه ويرضاه

نتمنى زيارتكم لنا فى حمله لو عرفوه هيحبوه للتعرف على حياه النبى صلى الله عليه وسلم

لو عرفوه هيحبوه يقول...

السلام عليكم ورحمه الله وبركاته

اسال الله ان يوفقك لكل ما يحبه ويرضاه

نتمنى زيارتكم لنا فى حمله لو عرفوه هيحبوه للتعرف على حياه النبى صلى الله عليه وسلم

لو عرفوه هيحبوه يقول...

السلام عليكم ورحمه الله وبركاته

اسال الله ان يوفقك لكل ما يحبه ويرضاه

نتمنى زيارتكم لنا فى حمله لو عرفوه هيحبوه للتعرف على حياه النبى صلى الله عليه وسلم

زهور الامل يقول...

سمكة واحدة

سموكة ازيك يا قمر أخبارك أيه
وحشتيني جدا

بالنسبة بقى للواقعة دي انا لما بكون ماشية مع اصحابي ويحصلي كدة بضحك لاني مش بكون مكسوفة اوي
لكن انا كنت ماشية لواحدي وكنت مكسوفة موت
ويمكن عيط من كتر الكسوف وكمان علشان رجلي وجعتني جدا
وانا كمان والله بتريق على طوب الارض والكل عارف عني كدة
حتى لو قعدت اتفرج على فيلم بكره العيلة في نفسهم من كتر التعليقات والتريقة ههههههههههه خصلة بقى ومش قادرة ابطلها

بالنسبة للشوذ بتاعي بقى
فانا سحلانة عليه سحل
كان شكله روعة بجد وكان جديد وكان مقاس 36 اللي هو مقاس رجلي يعني
ههههههههههه وربنا يسامحها بقى على باب النار اللي اخدته
كشفت راسي ودعيت عليها انه يتقطع وهي لبساه وماشية بيه في الشارع ههههههههه
منوراني يا قمر

زهور الامل يقول...

صفاء

صفؤة حبيبتي
منوراني جدا والله العظيم

انا الحمدلله رجلي فضلت كام يوم مجزوعة وكانت اتجرحت كمان لانها اتجلطت في الرصيف جامد بس الحمدلله بقت كويسة وبخير
ربنا ما يحرمنيش منك ابدا لان انتي حد جميل وانا مبسوطة بجد اني بعرفك مع اني مشوفتكيش بس طبعا شايفاكي بقلبي

وبالنسبة للشخص اللي وقع والله هو اللي استفزني علشان اضحك عليه لانه كان مغرور فوق الحد ومتكبر وعمال يبص حواليه بقرف فهو برضو اخد جزائه

منوراني يااجمل صفاء

زهور الامل يقول...

حب الملائكة

هههههههههه والله انت اللي جميل يا باشا

مكملتش ضحك ليه

انا دبلوقتي كل لما بفتكر الموقف بضحك

منورني يا قمر ومتشكرة على الدعوة الجميلة
بس برضو ما يقع الا الشاطر

زهور الامل يقول...

هنا تسكن روحي

ههههههه انا متشكرة اوي على تعليقك الرائع ده

بجد انت حد جميل اوي وانا مبسوطة جدا انك بتنورني بزيارتك ليا

وكلامك جميل بجد ( وش مكسوف)
اه من الحق فينك من زمان
ليه مفيش جديد ليك على المدونة

مستنيين جديدك قريب باذن الله

تقبل تحياتي

زهور الامل يقول...

maha zein

مهاميهو
ازيك يا قمر
انتي فين
وحشاني جدا جدا
انتي مستخبية فين يا بنتي

تعرفي اني فطست من الضحك على البوست بتاعك لما وقعتي على السلم المتحرك

كان بوست رائع بجد

وانا من يوم ما وقعت حرمت اني اتنك تااااني
بقيت بمشي وانا مسكينة ومنكسرة الجناح
وباجي عند المكان اللي وقعت فيه وامشي بشوووووووويش

اه ماهو اللي يتلسع من الشرب يتصل بالمطافي ههههههههه

منوراني يا مها وعايزين نشوفلك جديد وابقي اسالي مكنشي عيس ونت ده

زهور الامل يقول...

akeed

اول زيارة واجمل زيارة

وانا كمان زورت مدونتك وعجبتني جدا ومتشكرة اوي على تشريفك ليا

وسنتواصل باذن الله

تحياتي

زهور الامل يقول...

المسلم الصغير

الله يسلمك من شر يا قمر

والله انا مش شمت فيه بس هو كان متكبر جدا وبيبص لكل الناس بقرف وعنتزة جامدة جدا

وانا متعودة والله على الكعب العالي بس مش بتمايع وانا ماشية انا ماشيتي ثابتة جدا بس زي ما تقول علشان كنت ماشية مش مركزة او سرحانه رجلي اتزحلقت واتلوت

وبالنسبة للشوذ بقى فهو فضل يتسرق منه فردة 4 ايام ورا بعض والاخر اتسرق كله وكنت والله حطاه في الجزامة تحت الشوذ بتاع اختي
حد رفع بتاع اختي واخده ومشي

يلا بقى ربنا يسامحها اللي اخدته

منورني جدا

زهور الامل يقول...

د/ أحمد لاشين

ازيك يا دكتور احمد
الله يسلمك من كل شر

اه حرمت يا بابا
مش هتريق على حد تاني
ولا هتنك على حد تاني
هههههههههه
منورني جدا ومتشكرة اوي على دعوتك الجميلة

تحياتي

زهور الامل يقول...

mimi

ازيك يا ميمي فييييينك من زمان وحشاني جدا

والله يا ميمي انا مش سخرت منه هو اللي نرفزني بتناكته وتكبره وبصته لينا بقرف

وكمان معرفتش مين اللي سرق الشوذ بتاعي ( وش زعلان)
ربنا يسامحها بقى اللي روحتني من غير شوذي هههههههههه

منوراني

زهور الامل يقول...

بحب الحكومة

ازيك يا هاني اخبارك ايه

اه يا هاني
بلبس كعب عالي ووقعت وكنت بشتغل في شركة نصب ههههههههه والشوذ اتسرق في المسجد واسمي زهور عجايب وغرايب
هههههههه
بس انا بشوف رجالة كتير يبلبسوا كعب عالي اليومين دول تفتكر ليه؟؟؟

منورني جداااااا

زهور الامل يقول...

الحزين

الله الله يا محمد على الضحكة الطويلة والجميلة دي يارب تكون كانت ضحكة بجد

انا سعيدة اوي في اني السبب انك ضحكت

اه شوفت يا محمد كل شيء سلف ودين حتى المشي على الرجلين والودنيين

ههههههههههه منورني يا محمد

زهور الامل يقول...

الست فرويد

والله انتي اللي عسل وسكر
وانا سعيدة اوي بزيارتك ليا وزيارتي لمدونتك الرائعة بجد

منوراني جدا

زهور الامل يقول...

بنت الاسلام

البقاء لله وانا لله وانا اليه راجعون

جزاكي الله كل خير

منوراني

زهور الامل يقول...

حياتي نغم

ازيك يا اجمل وارق نغم في الدنيا

انا سعيدة اوي اني ضحكتك
منوراني اوي بجد

ربنا ما يحرمنيش منك يا قمر

تحياتي

زهور الامل يقول...

محمد عبد الرحمن شحاته

ازيك يا محمد
متشكرة اوي على الزيارة

والله انتي اللي عسل

وصحيح كل شيء سلف ودين حتى المشي على المناخير

تحياتي

زهور الامل يقول...

momken

ممكن ازيك يا باشا

عجبتك الحكاية دي في منها كتييييييييييييييير
وبعدين احكيلك فين هو انا بشوفك ولا عارفة الاقيك
انت يا عزيزي عامل زي الزئبق محدش يعرف يمسكه

ابقى اسال عليا بس وانا هحكيلك كل حاجة

اه شوفت يا ممكن شوفتني وانا مدلوقة على الارض والناس بتقومني
كان منظر فظيييييع بجد ولا لما شلضمت وعيط زي الاطفال

هههههههههههه بالنسبة بقى لموقفك انت
انت عارف انا لو كنت شوفتك في المنظر ده كنت وقعت من الضحك على الارض لحد لما كنت اخليك تسيب الفندق وتخرج تاني وتحرم تتعزم مرة تانية
اصلي بجد فظيعة لو شوفت اي حد واقع مقدرش امسك نفسي من الضحك حتى لو كانت امي ههههههههه


والله انت اللي عسل وسكر كمان

وبعدين ااه انت قولتلي اننا نصبيين وحرميين وبنضحك على العميل وندبسه يعمل عقد بالالوف ههههههههههه امال ناكل عيش منين يا بني

مااااااااااااشي بقى انا نصابه طب لما اشوفك

منرني جدا يا اجمل ممكن وبتوحشني اوي

تحياتي

زهور الامل يقول...

رابطة هويتي اسلامية

ان شاء الله ربنا يقدرني والبي الدعوة

منورني

زهور الامل يقول...

كلام من قلبي

والله انا ما تريقتش
انا ضحكت زي كل الناس ما ضحكت

وكان فعلا شكله فظيييع وهو واقع

منوراني جدا

زهور الامل يقول...

غير معرف

وانت منورني جدا جدا

تحياتي

زهور الامل يقول...

sweet angel

متشكرة اوي على الزيارة وان شاء الله نتواصل

تحياتي

زهور الامل يقول...

شريكة في المطعم

اه شوفتيني بقى وانا ماشية متنكة وراسمة نفسي اوي وبعدين اندلقت على الارض ههههههههههه يا لهويي كان حتة منظر تحفة بجد

ولا شركة السياحة
كل يوم ماهو جديد وعجيب

واحد والله حلف على مراته بالطلاق قدامي

وواحد زغد مراته في جمبها قدامي وكان هيقوم يضربها بالشوذ

ولا الالفاظ اللي كنت بسمعها من الاسرة البيئة
دنياااااااااااااا
التيم شير ده دنيا

عملي عقدة نفسية من البشر
ههههههههههههه

منوراني اوي يا قمر

زهور الامل يقول...

magia da ines

ولو اني برضو مش فاهمة ولا كلمة لاني نسيت كل الفرسناوي بس برضو سعيدة جدا بالزيارة وان شاء الله استعين بحد بيعرف فرنساوي ويترجملي تعليقك

وعلى كل حال انا سعيدة اوي بزيارتك ومبسوطة جدا بيها

منوراني

زهور الامل يقول...

مدحت محمد

اه يا مدحت شوفت التريقة عملت فيا ايه

هو انا عارفة ابطل تريقة بقى

منورني يا مدحت

زهور الامل يقول...

مهاجر في وطني

هههههههههههه اوعى تكون بتقعد متنك
شوفت اخر التناكة ايه
اندلالالالالاق على الارض
هههههههههه
ميرسي جدا على الزيارة الجميلة دي وان شاء الله نتواصل

تحياتي

زهور الامل يقول...

donya

ههههههه انا مبسوطة اوي اني خليتك تضحكي ورسمت بسمة جميلة على وشك

والله انا كان هاين عليا اقوم اشده من على الكرسي اوقعه بالعافية

بس كنت متوقعة انه هيحصله حاجة زي دي

اللي ضحكني اكتر ان امه وابوه كمان ضحكوا عليه

متشكرة اوي على الزيارة الجميلة دي

وحااضر من عينيا هخليها تدعيلنا كلنا

منوراني جدا

زهور الامل يقول...

جارة القمر

ازيك يا علياء
اخبارك ايه
يارب تكون كل امورك تمام باذن الله
وازي صحة ماما

والله انتي اللي رائعة
واهو الواحد طول الوقت بيتعرض لمواقف محركة بس الموقف ده كان محرج زيادة عن اللزوم

منوراني يا قمر وماتغيبيش عننا تاني

تحياتي

زهور الامل يقول...

لو عرفوه هيحبوه

وعليكم السلام ورحمة الله وبركاته

ماشاء الله اسم مدونتك في منتهى الروعة

اللهم اصلي واسلم عليك يا رسول الله

ان شاء الله البي الزيارة قريب جدا

منورني وشكرا للزيارة