الخميس، 9 يوليو 2009

الزواج بالشات..... موضة العصر!!!


لقد لجأ الكثير من الشباب والفتيات في الآونة الأخيرة إلى التخلص من شبح العنوسة عن طريق الشات وأصبحت هذه الوسيلة كحل بديل موضة سائدة سواء في الوطن العربي أو الأجنبي.
حيث أن الزواج عن طريق الشات أو الانترنت يعتبر من أحدث الوسائل التي انتقلت إلينا من الغرب.
وقد جمع الشات بين كثيراً من الأزواج والزوجات التي تفصل بينهم ألاف الكيلومترات وتفصل بينهم أيضاً اختلاف العادات والتقاليد والبيئة واساليب التربية
إلا أن مجتمعنا المصري لا يستطيع أن يتقبلها إلى الآن حيث أنه يرى أن في ذلك مخاطرة كبيرة فقد يتم الاصطدام بالواقع عندما يكتشف كلا من الطرفين طبيعة الآخر فسرعان ما يزول هذا الاعتقاد بهذه الوسيلة المليئة بالمخاطر الغير محسوب عواقبها.
ولقد أثبتت معظم الدراسات فشل هذه الطريقة إلى حد ما لآن كلا من الطرفين يحاول إخفاء عيوبه وإظهار طباع وصفات غير صفاته ليرسم في ذهن الطرف الاخر صورة جيدة له.
ولقد قمت بأخذ أراء مجموعة من الفتيات والشباب لكي أعرف وجهة نظرهم في هذا الموضوع
فمنهم من قالت لي أن الزواج بهذه الطريقة يعتبر زواج خاطئ ولن يستمر حيث أن الزواج لابد أن يتم عن طريق التقارب في وجهات النظر والقبول والارتياح وذلك لن يتم أبداً عن طريق الشات ولا عن طريق شاشة صماء حيث أن الانسان يظهر كدبه أو صدقه من خلال عينيه أو تصرفاته وأفعاله
وقالت أخرى أن من أراد أن يتزوج من خلال الشات يعتبر شخص غير سوي وأن يكون شخص من مجموعة أشخاص إما يكون أحدهما رجل مطلق وعندما يتقدم لأي فتاة بنت بنوت ترفضه وأهلها يرفضوه فيلجأ إلى الشات ليتعرف على فتاة ويقنعها أنه إنسان جيد ويوقعها في شباكه وبذلك يضمن أنها سوف تتمسك به وتفرضه على أهلها. أو يكون شخص مغترب أو يعمل بالخارج وليس لديه وقت لاختيار عروسة فيقوم بعمل علاقة حب زائف مع فتاة على الشات ويقنعها أنه فور نزوله مصر سوف يتقدم للزواج منها ويحاول إقناعها بأنها هي الفتاة التي يبحث عنها منذ سنوات وأنها هي التي سوف تسعده.
وقال أخر أنه قد يكون الشخص يريد عمل علاقة غير شرعية فيقوم في البداية باقناع الفتاة أنه يحبها ويريد الزواج منها وعندما تتعلق به كما يتهيأ لها يخبرها أنه لا يستطيع الزواج حالياً لسوء ظروفه فيلجأوا إلى عمل هذه العلاقة أو الزواج العرفي
ومنهم أيضاً من يريد التحدث مع الفتاة في كلام لا يرضي رب ولا عبد باسم الحب وبأنه سوف يتزوجها وأن ذلك يعطيه الحق في أن يتحدث معها في ما يريد.
وعندما أخذت رأي شاب أخر قال لي لا وألف لا حيث أنني أرى أن في ذلك مغامرة كبيرة وأن أكثر من 90 في المائة من المتواجدين على الشات أخلاقهم سيئة وأنني واثق أن فرصة أنك تجد إنسان جيد في الحياة العادية أفضل مائة في المائة من الشات وأن الارتباط عن طريق الشات نسبة نجاحه ضعيفة جداَ
وأخذت رأي شخص أخر فقال لي عادي مثله مثل أي مكان أخر أو وسيلة أخرى للزواج مثلا الزواج عن طريق صديقة لكي أو عن طريق الخاطبة ولو الشاب إنسان محترم ما هي المشكلة
وقال آخر أكيد لا يوجد زواج عن طريق الشات وإذا وجد يكون زواج مصلحة أو تسلية
وقال أخر أيضاً أن الشات بداية تعارف وادخلوا البيوت من أبوابها بعد ذلك وماهو المانع أن أتزوج من الشات إذا كانت الفتاه محترمة ونحن من المؤكد سوف نلتقي في منزل أهلها
وعندما سألته ماذا ستفعل لو جاءت أختك ذات يوم وقالت لك أنها تتحدث مع شاب على الشات وأنه يريد الزواج منها؟
قال لي الشات وسيلة مثله مثل العمل أو الجامعة وسوف أسأل عن هذا الشخص وإذا كان محترم سوف أرحب به.
وقالت فتاة أخرى إنني أجد في هذه الطريقة للزواج بعداً عن الدين حيث أمر الله الرجال بأن لا يواعدوا النساء سراً وامرهم أيضاً بدخول البيوت من أبوابها وأرى أيضا أن شاشة الكمبيوتر تخفي أشياء كثيرة عن الطرفين ويوجد ضحايا كثيرة جدا للزواج بالشات والانترنت.
وفي النهاية أريد أن أعرف آرائكم أيضاً في هذا الموضوع الذي أثار الجدل في هذه الفترة الأخيرة.

هناك 43 تعليقًا:

فراشة يقول...

بهنيكى زهور على الموضوع الرائع

طبعا انا من المعارضين لهذا النوع من الزواج
للاسف ثقتى فى النت والشات بالاخص معدومة

مهما كان صدق من تحدث معى للاسف دائما اضع النية الغير سويه من هذا الشات
كما ناقشتى وكما قال بعض من اخذتى برأيهم فالشات لا يظهر الحقيقة
لاننى لا اعلم من يحدثنى وماهى قيمة الصراحه لديه وماهو قيمة الصدق لديه

بالنسبة لى اقسم وانا اتحمل قسمى بأننى اذا تحدثت مع احد اكون صريحة ولا اتجمل ولا اكذب لأن الصدق
لابد ان يتواجد فى كل وقت فى السر والعلن

لكنى لا اضمن ان من يحدثنى يضع قيمة للصدق كما افعل
او كما لابد ان يحدث
لست اقول على نفسى اننى ملاك ولكن اقصد انه لابد ان يتواجد الصدق فى كل وقت لان الله يرانا

لهذا فأنا آخذها من اصرها ولا اتحدث من خلال الشات الا مع صديقاتى ومن اعرفهم فقط

اما الزواج فده استحاله
الزواج له اصول لابد من اتباعها وتوافرها

بحييكى جدا على موضوعك وطريقة مناقشتك يا زهرة الزهور

هيفاء عبده يقول...

موضوعك جميل زهور :)
المجتمع العربي لن يتقبل ولم يستوعب بعد فكرة التعارف عن طريق الانترنت او الشات كما تطلق عليها بغرض الزواج الحقيقي ..
لذلك يساء استخدام الانترنت لهذه الامور
فأغلب الشباب يتعرف على الفتاة بغرض التسليه او التلاعب بعواطفها او الاطاحة بها ..وهذا للاسف ما تقع به اغلب الفتيات دون وعي منهن
فلو استخدم الشاب او الفتاة الانترنت بغرض التعرف فقط واكرر فقط ..
ثم اكمال المشوار بالشكل المعروف لديننا الاسلامي والطريقة الصحيحةوعلى حسب عاداتنا وتقاليدنا
لكان الامر يختلف وافكارنا تختلف
ولكن ما يحصل في الوقت الراهن من مشاكل وقصص من تهورالشباب تثير تقزز النفوس وتجعلنا ننفر من مجرد الفكرة فقط ..ولا نلام

مجرد رأي ارجو تقبله
واكرر شكري زهور لطرحك الموضوع

رؤية يقول...

على الرغم من عدم تاييدى للزواج بهذه الطريقة لانه بالفعل وسيلة خداع كبرى لا مثيل لها
الا انه لا مانع من وجود زيجات ناجحة بفعل الشات وقد شهدت ذلك بنفسى فى بعض الاصدقاء

عموما ارجوا الاحتراز فقط وعدم الانجراف وراء اوهام
وزى ما البعض قال
ادخلو البيوت من ابوابها


ليكى تاج عندى
ياريت تقبليه

تحياتى

صدفة جميلة يقول...

مش عارف الموضوع محير بجد
يعنى اعرف واحد جارى تزوج من خلال النت ومستقر وتمام
ولكنى عملت تجربه عمليه على نفسى خسرت فيها الكثير ولكنها اثبتت بجداره انه ليس هناك علاقه على النت ولا اى شيىء سوى كلام متبادل للتسليه للتعارف للصداقه لاغراض اخرى ولكنه لا يتعدى الثقه الذائده
انا كنت اعرف وتعرفت وكنت قريب جدا من انسانه وكنت بفكر بالارتباط بيها وبسبب النت خسرتها للابد
مش عارف بس فى الاول والاخر لا احد ينسى كلمة النصيب والقدر ولا احد منا يستطيع ان ينكر ذلك والله اعلم
اسف للاطله

هيثــم رمضـــان يقول...

السلام عليكم
أولاً أنا مبسوط علشان ده أول تعليق ليه في مدونتك .
ثانياً الموضوع جميل جداً ومفيد وفيه كلام كتير وأنا شخصياً لا أميل لهذة الطريقة في الزواج (الشات) وأري نسبة نجاحها ضعيف جداً ونجاحها يتوقف علي أخلاقيات الطرفين وألتزامهم بالعادات والتقاليد المتعارف عليها في المجتمعات العربية وأيضاً تأكدهم من أنهم مناسبين لبعضهم البعض في كل شيء وأنا شخصياً أعرف أحد الأشخاص عن قرب تزوج بهذة الطريقة وكنت لا أوافقه في خطواته الاولي وكنت مستغرب لانه معروف بشدة تدينه ولكن حدث تعرف علي الشات ومن بعده زيارة في منزل العروسة وتوالت الخطوات حتي تم الزواج في وقت قصير ورغم هذا يأتي لي إحساس دائم بأنه يشعر بالتسرع في الاختيار ورغم نجاح التجربة حتي الان إلا أنه غير راضي عن تجربته مائه بالمائه وذلك يرجع لابتعاد الطرفين عن بعضهم البعض وأختلاف الشخصيات بينهم لاعتمادهم بشكل كلي علي الشات للتعرف والتقارب والتسرع في إتمام الزواج فتبدأ تظهر بعد الزواج العيوب وتفاصيل الشخصية التي قد لا يتقبلها كل طرف من الاخر .
والخلاصه أنا لا أحبذ الزواج عن طريق الشات ولكن إذا حدث التعارف فلابد أن تأتي الخطوات التالية بالشكل المتعارف علية ويمنحوا أنفسهم الوقت الكافي للتأكد من هذة المشاعر التي قد تكون كاذبة في معظم الاحيان وتكون مجرد إنبهار وقتي غالباً ما يتلاشي مع ظهور جميع جوانب الشخصية وتفاصيلها.

تقبلي تحياتي

مدحت محمد يقول...

اعتقد مفيش حاجة اسمها جواز من على الشات

ولو حصل اعتقد بيفشل فشل ذريع

وانا عن نفسى استحالة اتجوز من على الشات

صفــــــاء يقول...

زهور الجميله
عامله فرقعه جامدة بالبوست دة
لأنك طرحتى سؤال هو عام وبيتسئل بس دايما أجابته صعبه
يعنى ممكن تعرفى حد من على النت
ويكون محترم وتفكيرة راقى وممكن تعرفى حد يكون سئ جدااا
هو ممكن يكون وسيله صداقه ممتازة
لكن جواز وارتباط
الناس بتكون محتاجه تشوف بعضها .. تقعد مع بعض
الصورة تغنى عن 1000 كلمه
والشخص الفعلى اللى من لحم ودم بيكون واقع
مش مجرد حروف بتتوالى على شاشه افتراضيه

momken يقول...

انا مع المجموعه الى مش بتايد جواز الشات
لانه فعلا بيكون فيه خداع كتير

لكن ودى نمازج موجوده برضو فى ناس سعداء جداً

اه مش عن طريق الشات لكن اتعرفوا عن طريق النت

لكن انا شخصيا مع الناس الى مش بتايد الموضوع ده

وشايف اكتر ان الشات بيقتل المهارات الاجتماعيه عند الشخص الى بيدمن الشات

وبتكون كل حياته فى شاشه صماء ومجموعه مفاتيج فى لوحه التحكم

بوست رائع

تسلم ايدك


تحياتى

سمكه واحده يقول...

انا بقي مع المجموعه اللي مش بتأيد الزواج اساسا ياشيخه بلا وجع قلب (وش بيستهبل)
بصي انا هقلك حاجه انا حصل ادامي كذا حاله وتم زواج بس مكنش شات هي مجرد وسيله تعارف وكله تم بعد كده طبيعي بس في منها اللي ناجح جدا وفي اللي لاسف مش سعيد بصراحه انا بقول هي بتبقي صدفه ونصيب كده يعني
لكن زوراج شات انا مش مع ده خاااالص لانه بيفتقد معايير الزواج واسس الزواج السليم والمتعارف عليها حجات كتير جدااا(ايه الحلاوه دي يابت ياسمكه)
لكن النت مننكرش بنتعرف منه علي اجمل واروع الشخصيات اللي ممكن نقابلها وتمر في حياتنا وتأثر فينا

ممكن النت عن طريقه اعجاب ممكن انبهار بشخصيه معينه ممكن صداقه وتبقي افضل الف مره من الصداقه خارج النت

لكن كزواج وتأسيس بيت وأسره هي بتحصل بس مش شات
بس قليل والله اعلم بس دي بتبقي مخاطره واللي بينجح ربنا بيحبه وماماته دعياله

اقلك ياستي سيبي الشباب والبنات تتجوز وتهيص والناس تاكل عيش
تحياتي ياقمر

زهور الامل يقول...

فراشة

يا اجمل فراشة في بساتين الورد
انا سعيدة جدا اني شرفتيني بزيارتك الجميلة دي
انا كتبت في الموضوع ده لاني لاحظت انه انتشر جدا في الفترة الاخيرة دي وانه موضوع مهم ومحتاج واقفة
وانا معاكي ان الواحد ماينفعش يحط كل ثقته في اي حد حتى لو كان بيتعامل معاكي وجها لوجه
ومعاكي كل الحق في ان الجواز ليه اصول ومبادئ لازم نتبعها ونمشي عليها
وربنا يصلح حال كل البنات يارب
ميرسي جدا على زيارتك دي
تحياتي
ولو انتي كويسة وبتتكلمي بكل صراحة هتضمني منين انه بيتعامل معاكي بالمثل

زهور الامل يقول...

هيفاء وهبي

فعلا يا هيفاء
للاسف الواحد بقى بيسمع اليومين دول عن مصايب وفضايح بتحصل بسبب النت
والتلاعب بعواطف ومشاعر البنات
وده خطا برضو من الفتيات اللي بيحطوا نفسهم في الاوضاع دي
لازم يكون في حدود للتعامل
والحمد لله ان مجتمعنا العربي والاسلامي مش متقبل الموضوع ده ودائما كل اللي بيعملوا كدة بيكون عندهم احساس انهم بيعملوا شئ خطا وده في حد ذاته كويس لانه ممكن يكون في واقفة في وقت من الاوقات
انا بؤيد رايك
متوراني

زهور الامل يقول...

رؤية
انا بجد الفرحة مش سايعاني انك شرفتيني بزيارتك الجميلة دي
وانا معاكي اني النت ممكن يخدع ولازم نتعامل فيه بحزر جدا وماينفعش فيه الثقة الكاملة ولا حسن النية
وبرضو اكيد في حالات زواج بالنت ناجحة بس برضو نسبة ضئيلة جدا وده طبعا نابع من ان كل قاعدة ليها شواذ
وانا ليا الشرف اني اقبل تاجك الجميل وهيكون وسام شرف ليا يا اجمل وارق بسمة في الدنيا
منوراني جدا جدا

زهور الامل يقول...

صدفة جميلة
اهلا بيك في مدونتي المتواضعة
والموضوع مش محير ولا حاجة
انا من وجهة نظري مقتنعة تماما انه ماينفعش ارتباط بالنت ولا الشات حتى لو في حالات منه نجحت يمكن انا غلط بس جوايا احساس كبير جدا برفض الموضوع ده
ويمكن موضوعك اللي حصلك ده نقطة تحذير ليك بعدم تكرار الموضوع ده تاني
مش عارفة ليه دايما بحس ان اللي بنكلمهم على النت دول بغرض الارتباط بيكون في نظري زي اللهو الخفي واحنا اللي بنرسم صورة ليه في خيالنا ودائما وابدا بتكون مختلفة تماما عن الواقع
اتمنالك ان شاء الله حب بجد وتلاقي الانسانة اللي ترتبط بيها بعينك وقلبك وكل حواسك
منورني وشكرا على الزيارة

زهور الامل يقول...

هيثم رمضان

وعليكم السلام
ايه النور ده والله المدونة نورت بوجودك فيها يا استاذ هيثموانا اللي مبسوطة جدا انك شرفتني بزيارتك
انا معاك في كل كلمة بتقولها
وكمان في مشكلة محدش واخد باله منه
وهو بعد كدة هيكون في انعدام ثقة بين الطرفين لان كل منهما هيفتكر ان الطرف الاخر ممكن يكرر التجربة دي مرة تانية
وانا من رايك
منورني جدا

زهور الامل يقول...

مدحت محمد

ازيك يا مدحت
هو للاسف يا مدحت في جواز بالشات بس على رايك بيفشل
وزي ما قولت ان لكل قاعدة شواذ في نسبة ضعيفة جدا منه بتنجح
بس برضو انا معاك انه نظام فاشل جدا للزواج ودينا ومبادئنا وعقيدتنا ما تسمحش بيه
اتمنالك التوفيق
منورني ومشرف مدونتي المتواضعة
تحياتي

زهور الامل يقول...

صفاء

والله يا صفاء انتي اللي جميلة وكلك صفاء ونقاء ورقة
وكل بوستاتك بتعمل فرقعة جامدة في عالم المدونات

بالنسبة للموضوع ده انا عن نفسي اخدت راي ماما فيه وقولتلها ايه رايك لو اتقدملي واحد من على النت وجه علشان يتجوزني
قالتلي يالهوي انتي عايزة تفضحينا وتجيبلنا واحد من على النت وطبعا انا كنت باخد رايها بس علشان اقدر اجيب ابعاد الموضوع كله
وزي ما قولتي الصورة ونظرة العين تغني عن الف كلمة

منوراني دايما يا صفاء

زهور الامل يقول...

ممكن

من اول يوم عملت فيه مدونة وانا بستنى رايك في كل كلمة بقولها لان الفضل يرجع ليك انت في اني عملت مدونة وكتبت فيها اللي بحسه وتشجعيك دايما ليا هو اللي بيدفعني اني احاول اخليها على مستوى الرقي الفكري

انا كمان بؤيد رايك ومع كل كلمة انت بتقولها

وعندك حق فعلا النت بيقضي على المهارات الاجمتاعية وعلى المشاعر والاحاسيس وزي ما بيقولوا مابيخليش القلب يدق وبيكون التعامل مع شاشة صماء ولوحة مفاتيح يعني تعقيد في تعقيد
اللهم اجعلنا مش من المعقدين

منورني دايما ومشجعني يا اجمل ممكن في الدنيا كلها
ويارب اشوفك عريس قريب يارب وازفك بنفسي بس انت شد حيلك وانوي

تحياتي

زهور الامل يقول...

سمكة

يااااااااااااه ازيك يا سموكة والله انتي وحشاني جدا ومفتقدة لكلامك ورايك الجميل وخفة دمك اللي ملهاش حدود بتفكريني بنفسي وانا صغيرة ههههههههه
والله انا مش عارفة اقول ايه بعد كلامك الجميل
كل تعليق ليكي عندي يعتبر بوست رائع وجميل

وياختي بلا خيبة جواز ايه ووجع دماغ ايه مفيش احسن من قاعدة البت في بيت ابوها
انا عن نفسي ناوية اعمل جميعة للاضراب عن الزواج


وانا معاكي في كل كلمة ان الزواج عن طريق الشات بيفقد معايير الزواج السليمة والصحيحة
وكمان بيبقى في انعدام للثقة بين الطرفين دايما

منوراني

اسراء نايف يقول...

اولا بحييكي علي مدونتك الرااائعه دي
بالنبه رايي عن زواج الانترنت
انا مش ضدو ولا حاجه انا برفض فكره الكلام بين الجنسين ع الشات اصلا بس طالما هو بقي واقع وكده كده هيتكلموا فمفيش مانع من زواج الانترنت لو لقيوا ان صفاتهم متقاربه وكل واحد ارتاح للتاني يعني لقي فيه المواصفات اللي هو عايزها
بس احيانا بتكون مزيفه وبعد كده هيصدم ودي نسبه قليلييه فلكل قاعده شواذ

جارة القمر يقول...

عفكرة انا ليا صحاب تعرفو عن طريق النت وحبو بعض
واتجوزوا

فين المشكلة المهم ان الشخص يتعامل باحترام

الموضوع كتير حلو

بس انا مش من المعارضين

ولا المؤيدين

فقط أؤمن بالقدر

فهو يرتب طريقة للتعارف

مودتي

زهور الامل يقول...

اسراء نايف

اهلا بيكي يا اسراء منوراني
بالنسبة للكلام بين الجنسين على النت لو هيكون بمثابة صداقة ويكون الكلام في حدود الادب والاحترام والتناقش في مواضيع هامة بيتهيالي مفيش مانع

لكن بالنسبة للزواج او الارتباط الوضع هيختلف شوية
لان الاصدقاء هيكونوا بيتعاملوا بصدق شوية لان مفيش بينهم مصلحة انهم يكدبوا على بعض لكن الارتباط كل واحد بيكون عايز يرسم في ذهن الطرف الاخر صورة جيدة له

منوراني

زهور الامل يقول...

جارة القمر

ازيك يا جارة القمر
انا طبعا بحترم رايك ده بس برضو في مشكلة وهي انك متضمنيش ان كان الشخص بيكدب عليكي او بيتعامل معاكي بمنتهى الشفافية والصراحة وهو ده مربط الفرس

منوراني جدا

Che يقول...

زهور
معلش على الزياره المتأخره أوى بس ظروف ... بصى يا زهور ... انا مش مع مبدأ التعميم فى اى حاجه .. بس جواز الشات بيكون 99% منه كدب و خداع للاسباب اللى انتى قلتيه ... بس انا شخصيا اعرف ناس اتجوزت بيه ... صحيح فيه منهم اللى جوازته نجحت و فيه اللى جوازته فشلت ، بس مبدأ الجواز نفسه تم عن طريق الشات
لسوء الكظ احنا فى زمن حتى لو بنتجوز بالطريقه التقليديه ممكن تحصل نفس مشاكل جواز الشات ... لانه طلع انه مش ممكن تقدرى بنى ادم بنسبه 80% مش هاقول 100% ... بس يفضل فى الاخر الوازع الدينى و الاخلاقيات هى الاساس
موضوع جميل و طرحك ليه اجمل ... تحياتى

ضحكات الحياة يقول...

السلام عليكم

موضوع جميل و متميز جدا

و احلى جزء فيه ان فى استطلاع للأراء بيبين الأراء المتناقضة فى المجتمع و وجهة نظر كل واحد فى القضية

بس فعلا انا اعرف ناس جربت موضوع الجواز من الشات و هو الموضوع كويس

بس برده انا ليا تحفظى فى الموضوع ده ان كل واحد على الشات لا يمكن تعرف طباعه و لا طباع الأهل و ما خفى كان اعظم

و تحياتى لكى على البوست الةراءع

شريكة في المطعم يقول...

السلام عليكم ورحمة الله وبركاته

موضوع جميل جدا ومهم جدا لانتشاره الأيام دي
بصي انا رأيي ان الشات ممكن ييجي من وراه مشاكل كتير..ومش صح ان واحدة تثق في حد لدرجة انها تنزل تقابله وتكلمه وتدخله بيتهم ..مخاطرة كبيرة اوي
لكن لو تعدينا المرحلة دي وبقى خالص جوه البيت ..فهيكون زيه زي اي حد جاي من طرف حد تاني والعائلة متعرفوش خالص ..ولسه هيسألوا عنه..
ولكني مش مع الشات والي بيحصل فيه والتعارف الي من غير داعي ...الخ لان بيحصل فيه حاجات كتير خارجة عن الدين ولان كل واحد بيتخيل الي هو عايزه ودائما بيكون خياله ابعد ما يكون عن الحقيقة ..

بحييكي على البوست الرائع....

زهور الامل يقول...

che

ازيك يا عمرو لعل الظروف تكون خير يا رب
انت عندك حق في كل كلمة بتقولها بس مش معنى ان في حالات من جواز الشات نجحت يبقى دي قاعدة
الحالات اللي نجحت منه انا بعتبرها حالات شاذة لان لكل قاعدة شواذ
وزي ما انت قولت الوازع الديني هو اهم حاجة في كل حياتنا وفي الاول والاخر كل شيئ بيكون قسمة ونصيب

منورني

زهور الامل يقول...

ضحكات الحياة

وعليكم السلام
اولا انا بشكرك على الزيارة الجميلة دي والمتميز بجد هو انت
وانا صممت اني اعمل استطلاع للرأي علشان مكنش بقول اي كلام والسلام وعلشان اعرف وجهة نظر الناس في الموضوع ايه وكمان لولا اختلاف وجهات النظر لبارت السلع
وعندك حق فعلا في ان الكمبيوتر بيخفي معظم الحقائق لان كل واحد خياله بيصورله شيء هو مشفوش

منورني وشكرا على الزيارة

زهور الامل يقول...

شريكة في المطعم

اول لما قرات التعليق بتاعك نفسي هفتني على الطعمية وبسرعة رهيبة جيت المطعم بتاعك اكل منها
انا سعيدة اوي انك شرفتيني
بالنسبة للموضوع بقى فهو فعلا موضوع انتشر جامد جدا وتلاقي معظم الشباب داخلين عايزين يرتبطوا من على الشات مش عارفة هما بقوا عاجزين انهم يرتبطوا بالطرق العادية ولا ايه
وكمان الكدب والخداع بيكون كتير اوي والعقل بيصور حاجات غير الحقيقة وفي الاخر بيكون في تصادم بواقع مرير
وطبعا ماينفعش يكون في ثقة زايدة لان الشخص اللي بيكلمني ده سهل جدا انه يمثل عليا ويخدعني وده بالاخص في موضوع الارتباط لا بد انه يكون بحزر شديد
لكن انا من رايي ان الصداقة ممكن تكون افضل ميت مرة من الارتباط بالشات لان محدش ليه مصلحة انه يكدب على التاني

منوراني جدا ومتشكرة لزيارتك الجميلة والمرة الجاية تيجي ومعاكي طعمياية

Rosie يقول...

أنت دخلت فى الكلام الجامد جدا..أحييك على الموضوع ده...انا رأيي ان الجواز من الشات فكرةغلط...و عندك حق فىموضوع 95 فى المائة ناس مش كويسة على الشات و حتى لو لقاتى دايما هتندمى على بتعميليه لأنك هتبقى حاسة أنك بتعملى حاجة غلط...و لازم هتبطليه فى الآخر أو تكملى و تستمرى فى مشوار الأخطاء...و أكبر دليل على إنه مش صح انك مش هتقدى تقعدى وسط قاعدة قرايب مثلا و تقولى انا بتكلم مع واحد عشان اتجوز...لكن ممكن تقولى انا اتقدملى واحد أو شفت حد فى الشغل و هيتقدملى كده يعنى...
تحياتى لك و لمدونتك فى أول زيارة..

حياه بلا عنوان يقول...

السلام عليكم
انا اول مره ازور المدونه بس بصراحه الموضوع جامد جدا وحقيقى لان انا اعرف ناس اتجوز من الشات وعيشين حياه كويسه بس انا تفكيرى ان مش كله ممكن يكون نفس التجربه دى فى جواز يكون على الشات بس يكون فاشل لان جواز الشات او حب الشات محوم عليه الفشل انا كونت دايما اقول ان مفيش زواج من الشات لحد ما قبلت شخصيه وحكتلى انها اتجوز من الشات قولتلها ممكن يكون فيه بس بسيط جدا وممكن يكون الشخص ده غير اى شخص لان فىناس كويسه وصوابع الكف مش زى بعضها بس انا بعترض بردو على الزواج من على الشات بحيكى على البوست الجامد ده بجد تحياتى ليكى

حياتى نغم يقول...

السلام عليكم / والله أختى زهور قرأت تدوينتك مرات وحاولت التعليق مرات ولكننى فشلت فى إظهاره .
لو تسمحى تجعلى نظام التعليقات صفحة كاملة .
عموماً حنشر التعليق ولو ظهر انتظرى تعليقى على الموضوع :)

حياتى نغم يقول...

السلام عليكم / تحياتى لتدوينتك المهمة .

ورأيى فى هذا الموضوع ..

أن من يبحث عن الزواج عبر الشات لا يخلو إما أن يكون شخص يبحث عن فرصة زواج حقيقيه أو شخص يضيع وقته أو يمارس هوايه أو يبحث عن علاقه تستهويه أو يبحث عن علاقه محرمه أو أو ..

وإن فرضنا حسن نية أحدهم فمن أين نضمن حسن نية الآخر ؟

وإن حصل مجرد التجربة فإحتمال الخسارة وارد جداً
إما خسارة مادية أو معنوية أونفسية أوشرعية .

بمعنى أن البنت هى الخاسرة الكبرى إذا خدعت أو كذب عليها أو هجرها أو تركها أو .. أو ..

وإن حصل الزواج فمن أين نضمن ألا يشك أحدهما فى الآخر هل لازال يمارس هذا الأمر ؟ أو هل يستهويه ؟ أو هل جربه مع أحد من قبل ؟ هل ..هل ..

وأيضاً الشات يعتبر خلوة محرمة إلا إذا استخدمت فى آداء عمل أومهمة خيرية أو عمل جماعى المهم ألا يخالف الشرع ولا نخجل إن اطلع الله عليه .

والزواج الذى ترتاح له النفس ويرضاه العُرف والشرع معروف طريقته .

إما بالمشاهدة المباشرة ثم التعرف وسط الأهل أو التعامل المباشر فى عمل مثلاً أو السماع عن الشخص ثم مقابلته المقابلة الشرعية .

وأخيراً من ترك شيئاً لله أبدله الله خيراً منه .

اللهم أعن شباب المسلمين على العفة آمين .

جزاكِ الله خيراً زهورالأمل .

زهور الامل يقول...

rosie

ازيك يا روزي
انا دخلت في الوضوع ده وعارفة انه فعلا موضوع جامد ومش سهل وفيه اختلاف كبير في وجهات النظر والاراء واترددت كتير جدا قبل ما اكتب فيه
بس الاخر نشرته واجري على الله

وانتي فعلا عندك حق انه فكرة غلط وخصوصا كمان انك لو حد سالك العريس ده عرفك ازاي مش هتقدري تقولي من الشات او النت الواحدة تتكسف تقول كدة وهي دي عادتنا وتقاليدنا حتى لو كان الشخص كويس

اسعدني مرورك جدا

زهور الامل يقول...

حياة بلا عنوان

أنا سعيدة اوي انك زورتي مدونتي المتواضعة ويارب متكونش اخر مرة
واكيد ان في حالات هتنجح منه بس بسيط جدا وكمان الواحد مايضمنش لان زي ما انتي قولتي صوابعك مش زي بعضها
وكمان اي مجتمع فاسد بيكون فيه اعضاء كويسين لان لكل قاعدة شواذ

انا متشكرة اوي لزيارتك ورايك في الموضوع
منوراني

زهور الامل يقول...

حياتي نغم

اولا وقبل كل شيئ انا سعيدة جدا انك شرفتيني بالزيارة واسعدني اكتر انك صممتي تعلقي عندي وكمان انا في غاية الاسف انك حاولتي مرات وتعبتي علبال ما عرفتي تعلقي
بس والله غصب عني انا عندي مشكلة في المدونة بتاعتي في التعليقات وحاولت احلها كتير معرفتش انا كمان ساعات مابعرفش ارد على التعليقات الا بصعوبة شديدة جدا
بالنسبة لموضوع الجواز بالشات فانتي بصراحة بتعليقك ده كتبتي وقولتي كل شيء يخص الموضوع وتعليقك يعتبر بوست رائع لو كنت عرفته قبل ما اكتب موضوعي كان هيبقى البوست بتاعي افضل من كدة بكتير لان كلامك متزن جدا وعاقل ورايك ده انا معاه جدا وبايدك في كل كلمة

اسعدتيني بالزيارة

حاسوباتيه يقول...

هو موضوع جواز الشات ده ممكن يحصل بس بنسبه صغيره جدا بينجح بس لو فرضنا ان الاتنين الي اكلموا كانوا فعلا صادقين ممكن نعتبرها هنا وسيله تعارف لا اكتر وبعد كده الامور تمشي عادي وخلي بالك انا بقول مجرد وسيله تعارف لكن مش حب بقى لان الحب لايمكن يجي من الشات بس يعني يتعرفوا على الشات ماشي لكن الحب ده يجي بعدين ده رايي

جارة القمر يقول...

جيت اطمن عليكي

يارب تكوني بخير ياقمر


فين جديدك

احترامي

زهور الامل يقول...

حاسوباتية

اهلا اهلا اهلا بيكي يا حاسوباتية
على فكرة احنا زمايل ومجال واحد ولو اني كرهت المجال ده انا سعيدة انك شرفتين بزيارتك الرائعة دي

بصي الشات ممكن نكون من عليه صداقات رائعة ووسيلة تعارف فعلا لكن ماينفعش ارتباط من عليه ابدا ولا حب
اللي بيحصل ده اتحدى اي ححد يقول انه حب لان مفيش حب من وراء ستارة وحتى يا ريتها ستارة دي شاشة زجاج صماء

تحياتي

زهور الامل يقول...

جارة القمر

انا سعيدة اوي لسؤالك عليا اللي اقرب اصحابي مش عملوه
متشكرة ليكي اوي وقريب جدا هيكون في جديد

تحياتي

المتبهـدلـون فـي الأرض يقول...

la2 la2 haraaaaam

ana mn kam yoom geet hna w 3la2t t3laa2 tweel ,w dlwa2ti ana moash la2iih ,haram da ana t3bt feeh

ya zalama

ذو الوجه المبتسم يقول...

الموضوع ده خطير ومهم جدا
وبالرغم ان 90 % من المتحدثين عبر الشات بيكون عندهم نسبة كبيرة من الكذب فعلا
الا ان هناك الصادق فى حواره وفى احساسه

ممكن يحصل فعلا ترابك وحب فكرى وروحانى عبر النت
وينتهى بالارتباط الرسمة

اعتقد ذلك

تحياتى

أحذية صيف 2011 يقول...

حروف مصبوغة بماء الذهب هنا كانت
وبرحيق الياسمين هنا فاحت

أحذية صيف 2011
http://hawaa.alnaddy.com/article/261481

غير معرف يقول...

انا اعتقد انو يتعرفوا عن طريق الشات ممكن لكن لازم يعملوا خطوبة في الاول