السبت، 27 مارس 2010

تاااااابع/ دستور يا اسيادنا !!!!


معلشوا يا جماعة استحملوني انا عارفة اني مسببلكم رعب بعفاريتي دي بس اوعدكم دي اخر حكاية ليا مع العفاريت هقولكوا عليها مع العلم ان جوبعتي مليئة بالحكايات العجيبة والغريبة بس دول اكتر حاجة أنا متذكراها بحذافيرها.

تالت حكاية:

في يوم من أيام البطالة اللي كنت عايشة فيها من غير شغل بعد ما سبت شركة السياحة وقبل ما ربنا يرزقني بالوظيفة العيرة اللي أنا فيها دي كنت منفردة بجهاز الكمبيوتر بتاعي الموجود في حجرة الاستقبال بتاعتنا وطبعا كنت قاعدة ارتاح من عناء يوم كامل لان امي في الفترة دي كانت عاملة عملية جراحية صعبة شوية وكل قرايبنا بيجوا يزوروها وطبعا كنت طول اليوم واقفة على رجليا علشان أوجب الضيوف واعمل شغل البيت
وكنت ما بصدق ان الناس بدأت تخف عن زيارتنا ولو نص ساعة علشان اقعد وارتاح.
فقعدت وحطيت السماعات على وداني واسترخيت كدة وقعدت اسمع نجاة واتصفح بعض المواقع
واذ بجرس الباب يرن:- ترن ترن ترن
قامت أختي فتحت الباب وأنا عاملة فيها مش مركزة
فلقيتها واحدة ست قريبة أمي جاية تزورها
فدخلتها أختي في الأوضة اللي أنا قاعدة فيها وجت أمي وقعدت معاها وأنا بصيتلها برخامة كدة وابتسمت ابتسامة صفرة لما لقيتها قاعدة بتزغرلي.
وبتميل على امي وبتقولها هي دي بنتك الكبيرة؟
أمي قالتلها أه
فقالتلها هي خلصت كليتها ولا لسة؟
قالتلها أيوة خلصت
قالتلها مخطوبة؟
أمي قالتلها لا دي هي اتقرت فتحتها قريب على واحد من البلد الفلانية وسابته قبل الخطوبة بيوم
قالتلها وانتي أيه اللي مسكتك على كدة؟
قالتلها وأنا هعمل أيه يعني كل شيء نصيب
قالتلها حرام عليكي وذنب بنتك دي هيبقى في رقبتك دي خسارة تقعد كدة مادام خلصت كليتها. وحسست أمي إنها ارتكبت جريمة عظمى في حقي وأنا كمان كنت قاعدة قدامها موزة موزة يعني ( وش مكسوف ومطلع لسانه في نفس الوقت)
قالتلها واللي يحللك مشكلتها دي تعمليله أيه؟
أمي قالتلها إزاي يعني
قالتلها في واحد بيجي عندنا مصاحب ابني وشاطر أوي أوي وبنتك دي اكيد أكيد معمولها عمل أو لابسها جن ومفيش حد غيره هيعرف يطلعه من عليها
كل ده طبعاً وأنا رامية ودني في وسطهم وسامعة كل كلمة مع إنهم كانوا بيتوشوشوا وصوتهم كان هادي جداً. أعمل أيه بقى وداني سماعات استريو أخر موديل
أمي اترددت وقالتلها دي هي بترفض الحاجات دي جدا ومش هترضى
فالست قالتلها أنا هقوم وهجيبه وأجيلكم فجأة مش هخليها تلحق تعترض
فقامت مشيت واتفقت مع أمي إنها هتجيب الراجل اللي هيطلع عم عفروت اللي مجنني ده ومخليني معقدة من الجواز
ويادوب هي مشيت ولقيت امي جاية تتسحب جمبي كدة
وانا طبعا من غير ما ابصلها وعيني على شاشة الكمبيوتر وأيدي على الماوس وبكل برووووووود قولتلها:
انسسسسييييييييييييييييييييييييييييييييي
يا بنتي!!!!!!!!!!!
انسسسيييييييييييييييييييييييييييييي
الراجل ده مجرد إنه يدخل الشقة هو والست دي هطردهم شر طرده
ياحبيبتي ربنا يهديكي احنا مش هنخسر أي حاجة
قومي غيري هدومك واستعدي الراجل زمانه جاي هو والست
قولتلها اتست نينها هي وهو
هو كل واحدة تيجي تبخ في ودانك كلمتين وتقرفنا في عيشتنا
ياستي ارحميني من التخاريف دي بقى أنا تعبت بجد من الناس دي وكلامهم الاهبل ده
وبعد أقل من ربع ساعة لقيت الباب بيخبط مش عارفة كانت مخبياه على السلم ولا أيه!!
وفجأة لقيت الست جايبة شاب يادوب مايعديش 30 سنة وداخلة وأنا قاعدة مكاني
ساعاتها ركبني فعلا ميت عفريت أول لما لقيتهم جمبي
وقمت من على الكرسي وقلبته على الأرض قدامهم وفضلت ازعق وأصرخ ودخلت اوضتي ورزعت الباب في وشهم بعصبيه
لقيت برضو أبويا جااااااااااااي يتحايل عليا
وبما أني مقدرش أقول معاه بم ولقيته هيتعصب عليا والموضوع شكله هيكون فيه ضرب بالجزمة وهتبقى ليلة بيضة الليلادي : لبست وخرجت وأنا وشي بيطلع نار من كتر العصبية وقعدت ووديت وشي الناحية التانية
لقيت الشاب ده بدا يتكلم معايا وأنا مش ببصله ولا سائلة فيه
قالي أنا عارف إنك رافضة تماما الاقتناع بالأعمال والسحر والكلام ده وعارف كمان إانك مش طايقاني ونفسك تطرديني
بصيتله شوية كدة وقولتله : بصراحة أه
قالي طب خلينا نشوف وبعدين إنتي مش خسرانه حاجة
سكت شوية تاني وبعدين قولتله: طااااااااايب
قالي ممكن تنزلي تقعدي على الأرض على ركبتك
فنزلت ولقيته هو كمان نزل وقعد قدامي على ركبته
ولقيته إداني حاجة كدة نحاس مدورة زي العملة بالظبط ومرسوم عليها صورة عفريت وقالي إمسكيها في إيدك وبصيلي وبصيلها لحد ما تلاقيني بقيت زي الصورة الموجودة عليها بالظبط وتلاقي صوتي اتغير واخشن جداًً
قولتله نعمممم!!!!
عايز تفهمني إنك هتتقلب عفريت دلوقتي؟؟
قالي ايوة ودلوقتي هتشوفي وده طبعا لو إنتي فيكي حاجة أو ممسوسة بس طبعاً لازم يكون عندك استجابة
قولتله أوكي ماشي أنا معاك للأخر
وطبعا كل ده وأمي وأبويا والست اللي جايباه موجودين وشايفين كل حاجة

ولقيته بدأ الشغل بتاعه ولقيت جسمه بدأ ينتفخ ويحمر وصوته يخشن
أنا في الأول مقدرتش أسيطر على روحي من الضحك وببصله بتحدي وعند وبصيت لقيت أبويا كمان مبتسم ونفسه ينفجر في الضحك
ولقيته مع الوقت جسمه بينتفخ حتى لقيت زراير القميص بتتفك ووشه بيحمر جداا وصوته بيزيد خشونه ومنخيره بتطول
قولتله إشششششششششششششششششششششششششطة هي بقت كدة
كان نفسي وقتها أقوم أجري على أوضتي وأقوله يا فكيييييييييك (وش مرعوب)
بصراحة وبيني وبينكم أنا خوفت ولقيت قلبي بدأ يدق وحسيت إنه هيتحول عفريت وينقض عليا ولما لقاني بدأت فعلا أخاف رجع تاني لطبيعته
بس برضو فضلت على عنادي وقولتله ما شوفتش عفاريت قدامي يعني ولا حاجة!!
قالي أنا ممكن أوريكي عفريت بجد بس خفت عليكي لأنك مش هتستحملي تشوفيه وممكن يجرالك حاجة.
قولتله يا راااااااجل !!!!
قالي إنتي عندك نظرة أرضية وفي جان لامس جسمك وده نتيجة إنك بتبصي في المراية وكمان إنتي معمولك عمل بوقف الحال مرشوشلك وإنتي عديتي عليه
قولتله العالم كله بيبص في المراية وكمان طبيعي إني ألبس حجابي قدام المراية
قالي إنتي من الناس اللي سهل أوي إن الجان يلبس جسمهم
قولتله يعني انا دلوقتي متعفرته وفيا عرق عفاريتي؟؟؟
طبعاً عرف إني بستهزأ بيه وبتريق عليه فبصلي وقالي هقولك تعملي أيه علشان تخلصي من الموضوع ده

وقالي على سور قرآنية معينة أقرأها وآيات قرآنية أقرئها برضو وأمشي عليها فترة
وقالي على فكرة أنا ممكن أبقى في بيتي وأشوفك وإنتي في شقتكم هنا وأشوف كل تحركاتك
برقتله وقولتله نعمممممممممم؟؟؟؟
سيادتك كنت دخلت في علم الغيب
قالي لا بس أنا جسمي ملبوس وعليا جان بيعرفني كل حاجة
قولتله نهارك قشطة يا باشا إبقى سلملي على الجان

وحاولت فعلاً أمشي على النظام اللي هو قالي عليه وقولت مادام قرآن هعمله وده كلام ربنا وأنا الحمدلله بقرأ قرآن ومواظبة على صلاتي وكدة كدة مش هخسر حاجة
ونويت تاني يوم أعمل النظام اللي قالي عليه وقعدت ولسة بفتح المصحف
لقيت صريخ في الشارع وصويت : يالهووووووووووووووووووووووووووي الحقوا يا جدعان واحد قتل أخوه في الشارع ( وش يعبر عن خيبة الأمل اللي راكبة جمل)
طبعاً ما صدقت وقفلت المصحف وقومت جري على الشباك علشان أتفرج على الأحداث التي تتم في الشارع وانشغلت بيها وطنشت الموضوع ده وفي الآخر جريمة القتل طلعت وهمية والراجل مات لواحده اثر أذمة قلبية
وانتهت هذه القصة عند هذا
الموضوع ده كان من سنة وتلت شهور تقريبا

من أسبوعين بقى بتصل بواحدة صحبتي علشان أطمن عليها وبقولها مفيش واحد اطس في نظره وعايز يتجوزك
قالتلي والله يا زهور يا أختي كان في تلت عرسان بس طفشوا مرة واحدة
قولتلها لييييييه أكيد اكتشف إنك بتضربي بالبوكس. يابنتي قولتلك ميت مرة خليكي أليفة واتعاملي مع الناس برفق شوية وبلاش ضرب الروس بتاعك ده
قالتلي مفيش نصيب أصلي تقريباً معمولي عمل
هي قالت الكلمة من هنا وأنا الموبايل اترمى من ايدي من هنا من كتر الضحك
ولقيت اللي بتقولي متعرفيش شيخ من اللي بيعرفوا في الحاجات دي علشان أروحله أنا عارفة إنك تعرفي ناس كتير
قولتلها ليه هو حد قالك عليا إني واخدة توكيل مشايخ العفاريت على مستوى الشرق الأوسط وعلى العموم يا ستي ولا يهمك أنا هدورلك في دماغي كدة على شخشوخ كويس يطلع عفاريتك إنتي كمان. وبيني وبينكم بفكر أبعتها للشيخ زعبلة أبو سر باتع. أيه رأيكم أبعتها ولا بلاش؟؟؟؟ أرجو الرد سريعاً
وأي حد عايز يروح لشيخ يكلمني على زيرو زيرو خمس أصفار ماهو أنا بقيت ماركة مسجلة في العفاريت والأعمال. ( وش
متعفرت)

هناك 41 تعليقًا:

sweet angel يقول...

يالهوي؟
اية الرعب ده
والله انتي حرام عليكي

بس اعرفي حاجه
السحر مذكور في القرآن والناس فعلا بقت وحشه

sweet angel يقول...

لقاء المدونين بجامعة المنصوره
اللقاء التجريبي
يوم السبت القادم
أمام نادي أعضاء هيئه التدريس
خلف كلية الزراعه
الساعه 11 ص
برعاية مجلتنا
للإستفسار
عمرو وائل
spero_lover_boy@yahoo.com

top-fn يقول...

زي ما قولتلك قبل كده يا زهورر

ولا تحطي اي كلاآآمـ من دهـ بالك والناس اللى بتتعامل معـ الجان واعونهم دي ربنا هيسألهمـ

ومش فى شئ هيضرك الا بأذن ربنا خلي ثقتك فى ربنا اكبر واستعيني بذكر الله والقرآن واصبري وان شاآآء الله خير انتي مش اول ولا اخر واحدهـ تتخرجـ مثلاً يعني ومش تتجوز

على كدهـ بنات مصر كلهمـ معفرتين ^_^

خالص تحياتي ,,,

القمرالباكي يقول...

السلام عليكم

روحك حلوه وانتي بتحكي
ده بقي حال ناس كتير يقولوا عمل ومس وحوارات من دي
بس الظاهر الراجل الي جالك هو الي عليه عفريت خلاه يحمر ويزرق

تقبلي مروري

♥ ♥ Amira Samy ♥ ♥ يقول...

موضوع جميل جداً

مدونتك رائعة وعجبتنى أووووووى

تقبلى مرورى على مدونتك الجميلة دى

تحياتى لك

هيثــم رمضـــان يقول...

سيبك إنتي من عفاريتك دي كله بأمر الله بس إنتي خليكي مع ربنا وهو هيصلحلك الحال , والمهم إن إسلوبك في الكتابة حلو قوي وشيق جداً حاولي تتخيلي أحداث معينه وإكتبيها وإن شاء الله هتكتبي حاجات حلوه.

تحياتي

صفــــاء يقول...

يابنتى ابعدى عن السكه دى العفاريت سكتها وحشه ربنا يجعل كلامنا خفيف عليهم
دستوووور
أشتاتا أشتوت

ابو بدر الدين يقول...

سلام الله عليكم ورحمته وبركاته
انتي عارفه ان السحر فعلا موجود
وحقيقي بس المشكله اننا نرمى كل حاجه تحصل لنا على السحر
يعني اظن االيومين دول السحر بئى قليل جدا جدا
على فكره الاذكار بتقي الانسان من اي سحر
المعوذتين واية الكرسي تمنع من شر الجن والسحره
انا راي ان الراجل الي جالك ده مش بيعالج بالقران ولا شيخ ولا حاجه
لان الي بيعالج بالقران ما بيكون معاه صور عفاريت ولا حاجه
كله كلامه انه بيقرا قران واذا حدث تغيير للامامه بيكون فعلا سحر
وبيخرجه منه بايات قرانيه
اي واحد يعمل معاكم غير كده يبئى مش شيخ ده دجال او ساحر
وسلا ا ا ا ا م م م م م

هيفاء عبده يقول...

بعدين يا زهور ....
مش حنخلص من سيرة العفاريت
ياستي انت حلوة ولا اقدع عفريت يقدر يجي جنبك :)

بس اسلوبك شيق بالفعل في الكتابه
تمنياتي لك بسعادة لا تغادر حياتك

♥نبع الغرام♥♪≈ يقول...

ايه يا بنتى جو الرعب دا اللى معيشانى فيه

ههههههههههههههههههههه
وحشتينى ياقلبى اخبارك ايه يارب تكونى بخير

تعرفى مافيش احسن من سماع القرأن فى الحالات اللى زى دى وقرأة القرأن الكريم
احسن دواء وعلاج
وكمان الاذكار

ربنا يبعد عننا الحاجات دى بجد لانى عشتها وشفتها بجد انا تعبت فتره وكنت بتعالج وشفت الناس الدجلين اللى بحق
والحمد ربنا تاب عليا منهم
ونحمد ربنا على كل حال
ربنا يعفينا يارب
ويسعدك حبيبتى
وحشتينى اخر حاجه
ممموووووووووووووووووواه ليكى انتى

فراشة يقول...

هههههههههههه
يا نهارك ابيض يا زهور كل ده حصل
عارفه انا لو حد بس قالى الكلام ده حتبقى وقعته مش معدية
واحتمال انا اللى اطلعلعه العفاريت اللى ركباه
اوعى يا زهور تعملى حاجه من دى تانى حتى ولو على سبيل الهزار والسخرية
لأن ده شرك بالله
ربنا يبعدنا يارب عن كل مايغضب الله

وطبعا لازم تنصحى صاحبتك بأنها لازم تلجأ لربنا وماتفكرش فى التخاريف دى

قال تعالى {إنه ليس له سلطان على الذين آمنوا وعلى ربهم يتوكلون}

بس سيبك بقى من كل ده انتى دمك زى العسل
ربنا يحميكى ويرزقك الخير دايما يارب

micheal يقول...

أنا عمال بضحك على حكاياتك المعفرتة دي..بس أنا لو منك كنت حطيت أهلي قدام الأمر والقع ونزلت من الشقة بمجرد دخول هذا الكائن بس يلا اديكي ضحكتي وضحكتينا معاكي
شوفولي عفركوش صغنتوت كده يجيبلي شغل
أنا راجل عميد العاطلين منذ 2005
:(
تحياتي

سمكه واحده يقول...

اولا اذيك يا زهور يا قمكرايه
ثانيا بقي
انا من رأي انك تقوليلها علي الحج اللي بيبقي في بيته ويشوف الناس في بيتهم بيعملوا ايه
ههههههههههههه
عشان متعرفش تقعد برحتها وتحس انها مترقبه واخدالي بالك انتي
هو مفيش حد يعلمني اشوف الناس بتعمل ايه في بيتهم وانا في نفس مكاني
ده انا كنت هشوف البدع
(وش مطلع لسانه)
يارب تكوني بالف خير

تحياتي

a7med-Mado يقول...

أول زيارة للمدونة
بصراحة المدونة رعب بس من نوع مختلف
البوستات جميلة وبصراحة أول مرة أقرأ حاجة طويلة كدة وتشدنى
تسلم إيدك بجد
وإن شاء الله متابعك على طول

غير معرف يقول...

السلام عليكم
ازيك يا قمر
وحشتينى جدا واحب اهنيكى على مدونتك الرائعة
كالعادة دمك خفيف وابتسامتك ساحرة يا زهور
حكاياتك قريبة جدا جدا من الناس وبتمثل 75 5% من حال بنات جيلنا

بس ارجع واقولك
انى مش بصدق ف الكلام دة خالص
وطالما انا قلبى بزكر ربنا وحسنة الظن بية عمرة ما هيخ>لنى ان شاء الله

اتمنالك التوفيق مدونة تحفة جدا جدا

زهور الامل يقول...

sweet angel

عوووووووووووووو انا المرعبة
هههههههههههههههه
انا بحب ارعب الناس كدة

انا معاك والله في رايك ان السحر مذكور في القران والسنة
بس انا معترضة على طريقة التخلص منه

تحياتي

زهور الامل يقول...

عمرو

انا معاك واله يا عمرو
وكل شيء بيكون باذن الله وبامره

ومفيش حد يقدر يضر حد الا باذن الله
وانا والله الموضوع مش في دماغي خالص انا بس حبيت انقلكم مغامراتي مع الموضوع ده علشان تشوفوا الضحك على الدقون

ربنا يهدي كل الناس ويبعد عننا الناس المؤذيه
ويصلح حال كل البنات

منورني يا عمرو

تحياتي

زهور الامل يقول...

القمر الباكي


والله انت اللي روحك حلو وجميل يا قمر

والراجل فعلا شكله متعفرت وعايز حد يفك عفرته

بس اهو ضحكني يوميها وغير مودي
هههههههههههههه

منورني جدا

زهور الامل يقول...

سلسبيل

والله انتي اللي رائعة وجميلة وكلك رقة وذوق

ومتشكرة اوي على الزيارة الحلوة وراييك الجامد ده

تقبلي تحياتي

زهور الامل يقول...

هيثم رمضان

اذيك يا اجمد شاعر في عالم بلوجر

والله مفتقدين شعرك جدا

انا والله ما فارق معايا موضوع الجان والحاجات دي خالص ولا بصدق في الدجل ده

بس اهي مغامرات وحبيت انكم تشاركوني فيها لانكم اصدقائي

ومتشكرة اوي على كلامك الجميل ده ومتشكرة اوي لحضورك اللي بيسعدني دايما

ربنا ما يحرمني من تواجدك ابدا

تحياتي

زهور الامل يقول...

صفاء

ههههههههههههه صفؤة حبيبتي وحشااااااني مووووووووت

والله انا بعيدة خالص بس هما اللي بيجوني لحد عندي

شكلي كدة والله اعلم مولودة وانا فيا عرق عفاريتي
ههههههههههه

ودستووووووووور

منوراني يا صفصف

زهور الامل يقول...

ابو بدر الدين

وعليكم السلام ورحمة الله وبركاته

هو فعلا السحر موجود بس مابقاش قليل بالعكس ده بقى بيزيد والاقتناع بيه بقى بيزيد جدا مع نسب تاخر الزواج والعنوسة

انا بشوف ناس بيقدسوا الموضوع ده جدا وده اللي هيجنني
كله بقى بيرمي اي مشكلة عنده على السحر والاعمال مع اننا في القرن الواحد والعشرين

وفعلا الاذكار وقراءة القران والمواظبة على الصلاة بتمنع عننا كل الحاجات دي

وانا بعتبر الحاجات دي مغامرات بشوفها واهو الواحد يشوف الناس بتفكر ازاي
منورني جدا ومتشكرة اوي على الزيارة

تحياتي

زهور الامل يقول...

هيفاء

ازيك يا رق واجمل همس في الدنيا

والله انا بعيدة يا هيفاء بس المعفرتين هما اللي بيجوني لحد عندي

وربنا يكرمك يارب ويسعدك وميرسي اوي على حضورك الرائع عندي وعطرك اللي دايما بيملالي مدونتي وبنتظره دايما

منوراني جدا

زهور الامل يقول...

ابتسامة ملاك

انوسة حبيبتي
والله انتي الي بتوحشيني دايما وامنيتي حياتي اشوفك واتعرف علكي عن قرب

فعلا الاذكار والقران والمواظبة على الصلاة بتمنع عننا كل شر

ربنا يصلح حالك وحالي وحال كل الناس ويسعدك يارب
ومايحرمني ابدا من تواجدك الرائع ده اللي بيبهجني وبينورني دايما

تحياتي

زهور الامل يقول...

فراشة

ياااااااااااااه على الجمال والحلاوة وفرحتي بوجودك يا ارق فراشة

سعيدة اوي بوجودك
والله انتي اللي عسل وسكر ووحشاني جدا وكنت حاسة ان في حاجة مهمة جدا نقصاني
ورجعتلي تاني

ربنا يحميكي يارب ويسعدك

والله يا فراشة انتي لو تشوفيني في كل مغامرة من دول شكلي ايه
بتعفرت عليهم وافضل ازعق واعمل هيصة
بس باجي قدام بابا واسد خالص وانكمش

ربنا يبعد عننا كل الشر يارب

منوراني اوي يا فراشة

زهور الامل يقول...

micheal

ازيك يا مايكل
والله انا مبسوطة اوي اني ضحكتك
والله انا كنت هعمل كدة وهخرج واسيب الشقة بس ابويا بقى ربنا يسامحه ثبتني وبرقلي تبريقه خلاني اتكتمت خالص

بس اهي مغامرات

وبعدين من عينينا الاتنين هحجزلك عند الشيخ زعبلة يظبطك ويشوفلك وظيفة على كيفك

منوراني دايما يا مايكل

زهور الامل يقول...

سمكة واحدة
سموكة يا حبيبة قلبي

ازيك وازي كل اهل اسكندرية
هههههههههههه
والله تعليقك فطسني من الضحك
دايما بتبعثي البهجة في اي مكان تروحيه

والله انا بفكر برضو ابعتهاله بس خفت عليه منها اصلها ضخمة شويتين وممكن تخبطه خبطه تموته

والله بيني وبينك انا فضلت فترة منزعجة من موضوع انه ممكن يشوفني وانا في بيتنا ده وفضلت طول الوقت متحشمة وقاعدة محترمة في البيت
الخوف وحش برضو ههههههههه وش مذبهل

منوراني يا اجمل واطعم سمكة

زهور الامل يقول...

a7med_mado

ازيك يا احمد
اول زيارة واجمل زيارة ليا بجد

متشكرة اوي على رايك وذوقك الرفيع

وان شاء الله نتواصل

وربنا مايحرمنيش من تواجدك الرقيق ده ابدا

منورني

زهور الامل يقول...

غير معرف

وعليكم السلام يا ارق واجمد رونا فيكي يا منصورة

والله انتي الله وحشاني ونفسي موت اعملك مفاجاة واطب عليكي في البيت علشان بجد وحشاني ووحشاني ضحكتك وكلامك اللي بيريحني دايما

ومتشكرة اوي يا حبيبتي انك قبلتي دعوتي ونورتيني ونورتي مدونتي ياقمر
ربنا يخليكي ليا ومايحرمنيش منك ولا من وجودك في حياتي ابداا

ومتشكرة اوي على رايك ويارب كل حاجة اكتبها تعجبك

منوراااااااااااني مووووووووت

اقصوصه يقول...

عن نفسي احب قصص الجن وايد

طبعا انها مش من النوع اللي يأمن

بهالامور، بس ما نقدر ننسى انها

مذكوره في القران، يعني وجودها

حقيقه لا شك فيها:)

المتبهدلون في الأرض يقول...

طول عمري نفسي أربي عفريت في البيت كده وأحميه قبل ما ينام وآخده في حضني ..ياريت لو الراجل ده ليه مدونة تقوليلنا عليها
وبعدين إيه الصور الحلوة اللي في الجنب دي
وأنا مش مشغول عنكم ولا حاجة
إعزرونا بقه العيانين في الكلية مطلعين عيني ..وأنا مطلع سنانهم .,بكره تسمعي عني ..أو عنهم ( في خلف الأسوار

ذو الوجه المبتسم يقول...

ازيك اجمل زهور

بالرغم من الرعب الا انها مشوقة بجد
بينى وبينك باحب افلام الرعب قوووى
هههههههههههه
موضوع السحر موجود
لكن انا متفق معاكى ان ايمانك بالله اقوى بكتير من اى سحر
ربنا يوفقك ويرزقك بالرجل الصالح اللى تستهليه ويستهلك

تحياتى لاجمل زهور

صفــــاء يقول...

والنبى شكلك انت اللى بتحبى العفاريت وسيرتهم وبتدورى عليهم عشان تقعدى تضحكى كدة

كلك ذوق والله يا قمر

لاسع افندى يقول...

هههههههه

اول مره اعلق على موضوع بدون ما احاول اقراه

انا مش ناقص رعب
انا جاى اسلم وبس بقالى مده كل ما افتح مدونتك اقفلها واطلع جرى قلت عيب لازم ارمى السلام

باى
يجعل كلامنا خفيف

زهور الامل يقول...

أقصوصة

ازيك يا أقصوصة

بس هو فعلا السحر والمس الجني مذكور في القرآن وموجودين وناس كتير جدا بقت بتلجأليهم علشان يئذوا بعض
بس مش لازم برضو نرمي كل مشاكلنا عليه

وكمان الاعتراض هنا على طريقة التخلص من الجن والاعمال
لان اساليب الدجل والشعوذة والنصب في الامور دي زادت جدا

منوراني او يا اقصوصة وحمدالله على السلامة


تحياتي

زهور الامل يقول...

المتبهدلون في الأرض

اهلالالالالالالالالا
ازيك يا متبهدل أفندي
بقى انت نفسك تربي عفريت في البيت
تعالى وانا اديلك 5 عفاريت
ماهو انا دلوقتي بقيت متعفرته اخر حاجة
وبعدين هو انت مؤذي كدة ليه وعمال تخلع في اسنان الناس حرام عليك يا عم بكرة هتلاقي اللي هيخلعلك اسنانك ههههههه بعد الشر عني من خلع الاسنان

عجباك الصور اللي في الجمب دي
اتفضلها يا متبهدل واعتبرها مني هدية والله ماتغلاش عليك
الصور دي انا وخداها من ارضنا
كنت نازلة فسحة كدة اتفرج على ارضنا واخدت الصور دي وميرسي انها عجبتك

ومتتاخرش علينا تاني
علشان المرة الجاية هتاخد مخالفة ههههههه
منورني اوي يا متبهدل

تحياتي

زهور الامل يقول...

ذو الوجه المبتسم

اهلا اهلا
ازيك يا استاذ ناجي
منور المدونة والله
انا كمان بعشق افلام الرعب بس معرفش اتفرج عليها لواحدي لازم اتفرج عليها مع حد علشان انا بترعب وخوافة اوي

وفعلا السحر موجود والتخلص منه بيكون عن طريق التقرب من الله وقراءة القران والاذكار لكن مش باساليب الدجل الموجودة دي

تحياتي

زهور الامل يقول...

صفاء

والله يا صفؤة ده انا غلبانة
وكل مرة ماما تقولي على حاجة زي كدة بوافق بطلوع الروح وبغلبها وبطلع عينها والله

ده انا والله بترعب من الحاجات دي
بس المرة دي بجد فضلت اضحك طول الليل

اهو بنفك عن نفسنا
ههههههههههه

منوراني موووووووت

زهور الامل يقول...

لاسع أفندي

هههههههههههههه ازيك يا لاسع

بقى انت بتترعب وبتخاف
امال العيال الصغيرين يعملوا ايه بقى

المفروض تكون مغامر وتبحث وتنقب عن مثل هذه الاشياءهههههههههه

بس برضو منورني

تحياتي

غير معرف يقول...

السلام عليكم ورحمة الله

طلب بسيط
هو الاستمرار في هكذا تدوين
استمتعت بكل هذا الصدق
وبروعة وسلاسة هكذا قلم
وان كان لبعض الناس تخوف فلابد للابداع من ضريبة
ولابد من لجني العسل من ابر النحل
او لنقل لابد من فزع
احترامي

الخطاط
علي رحيل
مدونة المخلاة الليبية

Unknown يقول...



شركة تنظيف فلل بالقطيف
شركة تنظيف شقق بالقطيف
شركة تنظيف مجالس بالقطيف
شركة تنظيف موكيت بالقطيف
شركة تنظيف سجاد بالقطيف
شركة عزل اسطح بالقطيف
شركة مكافحة حشرات بالقطيف
شركة تسليك مجاري بالقطيف