السبت، 13 مارس 2010

تــابع/ دستــــووووور يا اسيــــادنا !!!!


تاني حكاية!
انتهينا من موضوع الشيخ زعبلة والأمور استتبت وأمي بطلت تتكلم معايا في الموضوع ده وعدت فترة ...
وفي يوم من الأيام كنت برة ورجعت لقيت مرات خالي وبنتها الصغيرة قاعدين مع أمي وقاعدين يتوشوشوا بصيتلهم كدة باحباط وقولت ربنا يستر
ازيكم يا جماعة وروحت سلمت عليهم
اهلا اهلا اهلا يا نور عيني ايه القمر ده !
قولتلهم في ايه شكلكم كدة بتخططوا لحاجة مش مطمنة ليكوا
ضحكت وقالتلي تعالي لما نقولك
المهم روحت وانا متوقعة هي هتقولي ايه كل ده وماما ساكتة وبتبصلي ومش بتتكلم
قالتلي نورا تعرف واحد شيخ من اللي بيطلع العفاريت وبيفك الأعمال وكانت عنده انهارده هي وواحدة صاحبتها وقالتله على اسمك
قولتلها وانا مسبلالها عينيا وفتحاهم نص فاتحة
نورا مييييييييييين؟
قالتلي نورا بنتي
قولتلها هاااااااا وبعدين؟
والراجل انزعج جدا وقالها انك معمولك عمل وطلب منها انك لازم تروحيله علشان يتكلم معاكي
بصيتلهم وسكت وأخدت بعضي وخرجت ورزعت الباب ورايا بعنف و أمي طبعا عارفاني معنى اني عملت كدة يبقى انا في قمة عصبيتي وليلتها بيضة مني
وبعد لما مشيوا جت علشان تمهدلي الموضوع وتحاول تقنعني قولتلها: لاااااااا حرااااام هو انتي مفيش وراكي غيري يا ستي ارحميني بقى اشغلي نفسك بحد غيري الله يخربيت دي عيشة ارحميني انتي وعيلتك دي بقى و كالعادة اتنرفزت وعيط وحلفت اني مش هروح لحد ولا هقتنع بالقرف ده
وكالعادة برضو لقيت بابا جاي ماهي عارفة اني مقدرش اقول بم معاه وانه هيخليني اروح غصب عني حتى لو اضطر يضربني
وتاني يوم لقيت بنت خالي جاية اتاريهم مدبرين كل حاجة وبعد محايلة وتوسل منهم ليا روحنا بالليل بعد صلاة العشا
وكان الشيخ ده في بلد ارياف جمبنا بنروح ليها ماشيين وروحنا من طريق زراعي صعب جدا بالليل وساحبني معاهم وانا حاسة اني في دوامة ومخنوقة جدا وبعمل شيء غصب عني ومتكلمتش طول الطريق ولا كلمة
روحنا بقى عند الراجل ده
لقينا بيته من دور واحد وبيت مبهدل جدا وكان واضح اوي انهم ناس فقرا جدا وعلى قد حالهم
والراجل ده عمره كان لا يزيد عن 35 سنة
روحنا لقيناه برة بيصلي العشا ومراته استقبلتنا احر الاستقبال وفضلت تتكلم معانا عن انجازاته وانه بيفك اعمال كتير وبيطلع عفاريت كتيرة جدا من على الناس
انا ولا بصيتلها وفضلت اتلفت حوليا ملقيتش أي حاجة في البيت تدل على انه راجل متدين ولا حتى بيفك الاعمال دي بالقران
المهم بعد شوية لقيناه جه وسلم علينا ودخلنا انا وماما وهو وبنت خالي اوضة كدة شكلها مقرف اتاريها اوضة النوم بتاعتهم
وحاطت فيها طبلية كبيرة على الارض وعليها كتاب وبخور وازايز كتيرة فيها حاجات كتيرة ولزاق سوليتيب وجاب بنته لا يزيد عمرها عن 5 سنوات
ولقيته ولع البخور وابتدى الشغل بالظبط زي ما بنشوف في الافلام العربي البخور والدخان والنظام ده بس هو كان لابس عادي وسالني على اسمي بالكامل وفتح الكتاب وبص فيه شوية
وفضل يسالني شوية اسئله وخلى بنته تقعد ووشها للحيطة ويقولها ها شايفة ايه وبيقولك ايه
البنت مكنتش بتتكلم فقط تمسك القلم وتشخبط كدة بشوية شخابيط وهو يقولي
قالي معمولك عمل واللي عاملاهولك واحدة قريبتك والعمل ده عاملاه عند شيخ من بلدكم وكلفها ستين جنيه
والعفريت اللي عليكي اسمه عفروت وقصدها انها توقف حالك وتوقف حياتك كلها وهو اللي بيخلي معدتك دايما توجعك ويخليكي ماتكليش وقال انه هيطلعه من عليا دلوقتي واحنا قاعدين
تخيلوا عفريت اسمه عفروت كان ناقص بقى يجيبلي كمان منى ذكي ومحمد هنيدي من الازازة
المهم فضل برضو يعمل شوية حاجات كتيرة كدة هو وبنته ويقول اطلع من عليها قبل ما ادبحك
اطلع من صباع رجلها الشمال اطلع مش عارف من ايه
والاخر قالي انا خلاص دبحته قدام عينك دلوقتي وقال ايه بنته شايفاه مدبوح
قولتله في عقل بالي حلاوتك يا جمييييل هي بقت كدة؟
وقتها حسيت بصداع رهيب ولقيت دموعي غرقت وشي غصب عني. قالي بتعيطي ليه قولتله مش عارفة بس انا عمري ما اذيت حد ومش قادرة اصدق ان في حد ممكن ياذيني
قالي بس اهو في حد اذاكي نعمل ايه بقى
وفضل يعملي قال ايه حجاب عبارة عن ورق مكتوب فيه كلام بالاحمر ويطبق الورقة جدا ويلف عليها سوليتيب
عمل اتنين وقال واحد تحطيه تحت مخدتك وواحد تشيليه معاكي وبخور كتير قال تعملوه وقال على الطريقة وازاي نعمله
انا معرفش ساعتها ايه اللي خلاني استسلم للكلام ده
المهم طلب من أمي فلوس واحنا خارجين وقالها والله انا ما باخد حاجة لنفسي ده تكلفة الحاجات اللي انا بعملها
روحنا وبرضو طول الطريق ما اتكلمتش ولا كلمة وماما وبنت خالي يقولولي صدقتي بقى واقتنعتي
اللي خلى أمي تقولي كدة ان الراجل ده قالي على حاجات بتحصلي بالفعل
روحت البيت وانا مخنوقة ومقدرتش امسك نفسي من العياط وانهرت جدا والصداع بيزيد معايا وجوايا صراع فظيع مش عارفة اصدق الكلام ده ولا لأ. وجريت على مرات عمي هي اكبر مني سنتين وصحبتي جدا وبحبها وبقتنع برايها روحت عليها جري وبصراحة معرفتش اجيبلها الموضوع ازاي . فقعدت جمبها ومتكلمتش ولا كلمة ودي طبعا مش عادتي معاها. لاحظت اني متغيره فلقيتها ميلت عليا كدة بالراحة وقالتلي في ايييييييييييييييييييييه ؟؟؟

بصراحة أنا كنت مستنية منها السؤال ده بفارغ الصبر علشان اتكلم وارتاح

قولتلها عايزة اٍسالك سؤال وتجاوبيني عليه بصراحة؟

قالتلي اسألي يا مغلباني. قولتلها انتي بتقتنعي بموضوع الجان والاعمال ده؟

قالتلي بصي يا زهور الجان والاعمال والسحر موجودين في القرآن والسنة وفي ناس كتير فعلا بتلجأ ليهم بس أنا عايزة أعرف ايه اللي حصل؟

فحكيت ليها اللي حصل كله. قالتلي كل اللي أقدر أقولهولك انك تشيلي كل الكلام ده من دماغك وقربي من ربنا على قد ما تقدري ومتحاوليش تخلي الموضوع ده هو محور حياتك وتعقدي نفسك بالشكل ده.

أنا بصراحة غصب عني الموضوع فضل كذا يوم مسيطر عليا ؟

وفضلت 3 ايام مكتئبة جدا والاخر فضلت افكر كويس وحاولت اشيل كلام الراجل ده من دماغي ورميت الحجاب والبخور ورفضت اني اعملهم لاني برضو مقدرتش اقتنع.


ومع حكاية تانية من حكايات دستور يا سيادنا!

هناك 22 تعليقًا:

سمكه واحده يقول...

وانا بلف في المدونات مصدقتش نفسي
لما لقتلك بوست جديد
فرحت اوي وعيني برقت واسبهليت وابتسمت
ايه يابنتي وحشتيني والله
ايه الغيبه دي
بجد فرحت اوي لما شوفت بوست ليكي
انا حبيت ارحب بيكي واقلك ليكي وحشه
وهقري وارجعلك تاني ياقمر
متغبيش تاني كده بجد

سمكه واحده يقول...

منا قلتلك يابنتي والله
عمك عفروت ده ممكن يمشي بالايمان والثقه بالنفس وقبلها بربنا سبحانه وتعالي وقرأه الاذكار ده لو في اساسا عفروت هقلك كذب المنجمون ولو صدقوا لعلمك في ناس كتير ممكن تقلك علي حجات بتحصلك فعلا وده اللي بيخليكي تشكي وتتجنني وبس ربنا يهديهم بجد لان عذبهم كبير عند ربنا ومضيقيش نفسك ولو الكلام ده زمان بردو مكنتيش تضيقي نفسك(: ولا تتخنقي ياجميل
كمان الصداع ده جالك من التفكير والدوماه اللي عشتي فيها متخفيش الصداع ده ضغط وتفكير مش اكتر والعياط ده كبت وخنقه ياقمر
عفروت ده راجل مش كويس انه قال اطلع من صواباعه الشمال احسن ما قال اطلع من اي مكان تاني والراجل استهبل هو وطلعه(وش مطلع لسانه)
جومي بينا نمشي
جومي بينا نمشي
ملط لاء ملط لاء ياعم الحج

فكرتيني واحده صحبتي مامتها عغملت فيها كده في المسجد كان راجل كده البنت بتحكلنا ومضايقه اوي لان الراجل كان بيطلع العفريت بالضرب وقالها متخفيش اللي بيضرب العفريت مش انتي انتي مش هتحسي وهوب بدا الضرب والبت تسرخ وتقول انا رباب انا رباب مش العفريت الضرب وجعها هي بتحكيلي وانا بضحك من الموقف انه ماسكها اداها علقه وهي بتقوله ياعم انا رباب مش العرفيت باين كان مامتها متغاظه منها وصته عليها
علي فكره كل ما اشوفها اروح قايلالها انا رباب انا رباب
تقولي متتلمي بقي
بعكسها
الحمد الله انه مطلعهوش منك بالضرب
بس دبحه ياجامد
يامي

متغيش كتير كده وانا كنت هنام وبنام علي نفسي بس مقدرتش انام غير لما اقري اللي انتي كتباه واعلق عليه ياجميل بوستك تحفه وممتع جدااا
دستور
سمحوه سمحوه
ده غشيم وميعرفش حاجه

تحياتي

♥نبع الغرام♥♪≈ يقول...

حمدالله على السلامة حبيبتى
ايه يا بنتى الغيبه دى كلها يارب تكونى بخير ويارب يطمنى عليك يارب ويكرمك خير
وياريت بلاش الغايب دا
عشان خاطرى

♥نبع الغرام♥♪≈ يقول...

جميل انك كملتى

بجد العالم دى اللى يمشى ورا كلامهم هيتعب اوووووووووووى
مافيش احسن من القرأن والاذكار اليوميه

بس دايمآ الاهل بيكون تفكريهم رجعى شويه

ربنا يهدى الجميع

نورتى مدونتك من تانى
تحياتى
ايناس

ذو الوجه المبتسم يقول...

السلام عليكم

طبعا قريت الحوارات كلها وجذبنى اسلوبك الحلو فى السرد

بصي يا ستى

انا حضرت جلسة لواحد شيخ برده من بتوع اللى بطلعوا الجن والكلام ده

وسمعت حواره من الحالة وقال ايه وعمل ايه

بعدها افتكرت انه خلاص طلع العفاريت والجن والذي منه

لكن فضلت الحالة على ما هى عليه والسبب ان تعبها كان عضوي وليس نفسي فقط وفيه حالات كمان شفتها لكن برده ؟؟؟؟

رايي الشخصي هو نفس رايي مرات عمك عليكي بالرقية الشرعية وقراءت القران


تقبلى تحياتى

شمس النهار يقول...

سلامتك

اقري كل يوم سورة ياسين ونهاية سورة البقرة

وحاولي تقنعي ماما بعدم جدية الحاجات دي
وان مانفعش

ماتروحيش تاني تحت اي ضغط

الناس دي ساعات كتير بتيجي من وراهم مشاكل لاحصر لها
ولومنك كل مااروح مكان بعدها ابلغ عن الشيخ المزعوم ده

سلامي

MOHAMMED ELBANNA يقول...

زهور الامل
اخيراً موضوع جديد لزهور الامل
موضوعك جميل وفعلاً بالرغم من ايماننا التام بوجود الجان وتأثيرها على الانسان ، الا انه احياناً كثيره يكون العفريت في رأسنا وعقلنا وليس اجسادنا .
تقبلي مروري
محمد البنا

الحــ ــزين يقول...

انا اسف انى مش دخل اعلق

بس انتى عرفة ليه

أولا متشكر جداعلى انك شرفتينى بزيرتك

ثانيا...ازاى غالى عندك وانتى حتى مفكرتيش تتصلى وتسألى ..مش يمكن أكون مت ولا أنا أصلا مش بفرق عند الناس

عموما متشكر لزيارتك جدا

الحــ ــزين يقول...

وأنا أسف اذا كنت عديت حدود معزتى عندك

micheal يقول...

ههههههههههه..دستووووووووووور..جهل جهل جهل
عارفة أنا كنت متخيل قدامي وأنا بقرأ هنيدي وهو بيقول لحنان ترك
جومي بينا نمشي
:)
وبعدين لما لقى رجل معزة
مش بصدق في حوار الأعمال ده خالص
تحياتي وحمد الله ع السلامة

top-fn يقول...

سيدتي الفاضلهـ

قل لن يصيبنا الا ما كتب الله

ولو اجتمع الإنس والجن على أن ينفعوك بشيء لن ينفعوك إلا بشيء قد كتبه الله لك ولو اجتمعوا على أن يضروك بشيء فلن يضروك إلا بشيء قد كتبه الله عليك

اما بالنسبهـ لما اخبركـ به من الامور التي تحدث لكي هي من حيل النصب والخداع واستراق السمع

فهؤلاء الاشخاص لهم اعوان من الجن يسترقون السمع ويخبرونهم بهذه الاشياء

ولا يضر بالطبع قوي الايمان ذلك سأذكر لكي سيدتي قصه ربما تبعث الاطمئنان فى قلبك وهي قصه حدثت فى قريه بجوار قريتنا " كان يوجد فى هذه القريه رجل مشهور بهذه الاعمال ويقال انه بارع فيها بشكل لا يصدق وهو يستغل هذا الامر عند المتزوجين جدد فيقوم بالتفريق بينهم او يجعل الزوج غير قادر من الاقتراب من زوجته ليلة العرس وفي كل ليلة زواج شخص يبعث هذا الرجل اخاه للعريس واهله يطلب منهم مبلغ من المال والا سيقوم بتنفيذ عمله ولن يستطيع التقرب من زوجته وجرب كثير من الناس عدم الدفع له وكان يصيبهم العمل قمه فى الاستغلال من منبع للشر

وفي نفس البلده تزوج شاب ولم يذهب لهذا الراجل واستطاع ان يتقرب من زوجته بشكل طبيعي لدرجة اذهلت الرجل الدجال فبعث اليه يتعجب من فعله كيف حدث هذا فأخبره الشاب انه ملتزم بقرأة القرآن وقراءة الاذكار فى الصباح والمساء

فالزمي اختي الدعاء وثقي فى قدرته واحملي معكي مطويه بها الاذكار اقرأيها فى الصباح والمساء وادعي ربك بالزوج الصالح وانتي على يقين من قدرته على ذلك

خالص تحياتي ,,

romansy يقول...

واخير ا زهور الامل بعد العمل
تعود الينا
ههههههه
اخبارك ايه يا مغلبانا
وايه الغيبه الطويله دى سيبك انتى من الكلام دا احنا مننكرش انهم موجودين بس اسعى كلام مرات عمك دا كلام جميل معقول قوى
قربى من ربنا واعرفى ان كل شئ نصيب

blue-wave يقول...

اخيرا ظهرتى؟؟؟
بجد مدونتك ليها وحشه كبيرة \موووت
وبعدين ايه جو العفاريت دا يا حجه بس هيا ناقصه خضه؟:))

هيثــم رمضـــان يقول...

حمدالله علي السلامه يا زهور إيه الغيبه دي أنا قولت الأسياد كسروا الكمبيوتر بتاعك كنوع من الأنتقام علشان البوست اللي فات ههههههههههه.

بصي بقي أنا مش هقول جديد بعد اللي الأصدقاء قلوه في التعليقات أنا ما قريتش كله بس كلام عمرو مثلاً مظبوط جداً وماتستغربيش إن الراجل ده عارف حاجات عنك علشان فيه نوعين من الغيب غيب لا يعلمه إلا الله وهو لم يحدث بعد وغيب حدث يعلمه بعض من الإنس والجن يعني مثلاً لما إنتي روحتي للراجل ده بالنسبه لي غيب وبعد ما إنتي حكتيه بقي مش غيب برضه الحاجات اللي قالك عليها حدثت بالفعل وقاله عليها الجن وأعتقد أنه علشان يقدر يعمل ده لازم يكفر بالله والعياذ بالله ,وطبعاً الحجاب والحاجات دي ده شرك بالله لأنه من يعتقد بأن الحجاب هيحميه يبقي أشرك بالله .

يعني كل اللي عليكي تعملي زي ما الناس الجميله دي بتقولك تحافظي علي الأذكار وتخلي عندك ثقه بالله إنه هو اللي يقدر يحميكي من كل شر وحافظي علي قيام الليل ولو ركعتين وإدعي قوي وإنتي ساجده وإن شاء الله هتبقي زي الفل وحولي تفهمي الناس اللي في البيت الكلام ده وأنا بإذن الله هدعيلك في العمره أنا مسافر بعد أسبوعين إن شاء الله, وأخيراً أوعي أوعي تفقدي الثقه بالله.

تحياتي

هيفاء عبده يقول...

الي اعرفه يا زهور انه الجان لا تتلبس الازهار الرقيقة
وخصوصاً ان كانت تكتنز بداخلها الأمل
ثانياً لا تقترب من ذوي المدونات الجميلة الراقية
ثالثاً والأهم ..لا تقترب بمن يحصنون انفسهم بالاذكار والورد ..

زهور الرقيقة..
اسلوبك مميز للغاية في سرد القصة .. صدقاً اقولها
ولكي اسلوب ممتع يرسم البسمة دون شعور وخصوصا في حوار التذمر منك ... بكِ شقاوة جميلة
والاجمل انكِ تنوعي في طرحك للمواضيع هنا

مميزة انتي يا زهور

حنين يقول...

زهور الامل
بوست حلو بس دايما افتكرى
لن يصيبنا الاما كتب الله لنا
العمل عمل ربنا
تحياتى

زهرة(جنى)الاسلام يقول...

السلام عليكم
لن يهدم ابدا سوف نفدية بدمائنا
ندعوكم للدخول الى شات مونتى يوم21/3/2010
تمام الساعة العاشرة مساءا
من اجل نصرة المسجد الاقصى

Che يقول...

وش مكسوف منك موت يا زهور عشان قله الزياره ... بس متزعليش منى عشان انا بجد مقل و مقصر
انا ضحكت بعد ما قريت حكايتك مع الناس اللى زى الفل دى ( ربنا يجعل كلامنا خفيف عليهم ) .... هههههههه
بس يفضل ان اشدهم هو الشيخ زعبله ، شكله سره باتع يا زهور .... انا بنصحك تكملى كورس العلاج معاه

ابو صهيب ( الجمعاوي الاصيل)سابقاً يقول...

اهم شئ لكي يستطيع النسان ان يحيى في هذه الدنيا هو الايمان وبالله والثقة في النفس
موضوع جيد بارك الله فيكي

momken يقول...

وبعدين معاكى يا ست انتى

انا مبقتش اعرف انام كويس بسبب حكياتتك دى

وعم شمهورش والاستاذ عفركوش والفانوس

بس برضو مغامرات...وحجات مشوقه


بس سيبك انتى طريقتك فى الحكايات روعه


تسلم ايدك

كمان تفاصيلك جميله اوى ودقيقه حسيستينا اننا معاكى


تسلك ايدك يا زهور


تحياتى

الحــ ــزين يقول...

yarb dyman tkwny fy afdl 7al

wawzen bs ntmen aleky

wyaret tkwny msamha

لاسع افندى يقول...

واضح ان الشيخ ده سر باتع وقدر يرجعك تانى للمدونه

احسن حاجه عملتيها انك تخلصتى من القرف اللى اداهولك السحر عمل الشيطان واكيد ربنا اقوى يعنى اللى يتعمله عمل مايروحش لسحار يفكه ويلجأ لربنا


تحياتى