الخميس، 21 يناير 2010

دستــــــــــــوووور يا سيادنا


موضوع خطير سيطر على عقول معظم الأمهات وكمان الآباء سواء في الريف أو في المدن..
أي أسرة دلوقتي لو بنتهم أتأخرت شوية في الزواج يبقى يا داهية دقي البت معمولها عمل أو عليها عفريت.
أو لو أم عندها طفل شقي شوية يبقى راكبه عفريت ومش طبيعي.
أنا واحدة من الناس عمري ما اقتنعت بالكلام ده وبالرغم من كدة غصبت على أن أدخل العالم ده وأشوفه وأشوف أيه اللي بيحصل فيه وليا تجارب عديدة في الموضوع ده .
أنا عن نفسي اعتبرت الموضوع ده كمادة علمية بدرسها وبعرف عنها وبعرف ايه اللي بيحصل فيها مش معنى كدة اني مش مقتنعة بموضوع الجان والمس الجني والسحر
المس الجني مذكور في القران والسنة والسحر وفي ايات كتيرة واحاديث نبوية بتنص على كدة ومنها بسم الله الرحمن الرحيم"الذين يأكلون الربا لا يقومون إلا كما يقوم الذي يتخبطه الشيطان من المس "

وأما الدليل الثاني فهو قوله تعالى: "وَمَن يَعْشُ عَن ذِكْرِ الرَّحْمَنِ نُقَيِّضْ لَهُ شَيْطَانًا فَهُوَ لَهُ قَرِينٌ*وَإِنَّهُمْ لَيَصُدُّونَهُمْ عَنِ السَّبِيلِ وَيَحْسَبُونَ أَنَّهُم مُّهْتَدُونَ*حَتَّى إِذَا جَاءَنَا قَالَ يَا لَيْتَ بَيْنِي وَبَيْنَكَ بُعْدَ الْمَشْرِقَيْنِ فَبِئْسَ الْقَرِينُ"

وأما الثالث فقوله -عز وجل-: "وَاذْكُرْ عَبْدَنَا أَيُّوبَ إِذْ نَادَى رَبَّهُ أَنِّي مَسَّنِيَ الشَّيْطَانُ بِنُصْبٍ وَعَذَابٍ"

وأما الرابع فقوله تعالى: "إن الذين اتقوا إذا مَسَّهُمْ طائفٌ من الشيطانِ تَذَكَّرُوا فإذا هم مبصرون"

كل دي ادلة وبراهين على ان المس الجني حقيقة موجودة في حياتنا

وبيكون ليه اسباب كتير

ومنها:

السحر والاعمال يعني دلوقتي اي واحدة عايزة تنتقم من واحدة تانية بتروح تعملها عمل والحكاية دي منتشرة في الارياف بشكل مش معقول

طبعا كمان النظر في المراية باستمرار

كمان الجلوس لفترات طويلة في الحمامات او الغناء فيها والصوت العالي في الاماكن الضلمة


لكن اللي انا بعترض عليها هو طريقة التخلص من المس ده وبعترض على الشعوذة والدجل واساليب النصب في حل فك الاعمال.

والاعتقاد الكبير في ان كل شيء في حياتنا بيعتمد على السحر والاعمال والمس


وهحيلكوا عن بعض منها علشان تشوفوا الضحك على الدقون!


أول حكاية.....
في يوم من الأيام قاعدين في أمان الله لقينا مرات خالي جاية عندنا وفضلت قاعدة شوية تتنمس كدة وتلف وتدور وبعدين أخدت أمي الطيبة البريئة في جمب كدة وقالتلها إنتي إزاي ساكتة على بنتك لحد دلوقتي دي اتخرجت من الكلية وبقت 22 سنة وكدة مش كويس وشيئ مايطمنش
ماما قالتلها وأنا هعمل أيه بس ماهي كل لما بيجلها عريس بترفض وتقول أنا مش مرتحاله ومش عاجبني
قالتلها لالالالالالالالالالالالا الكلام ده مايتسكتش عليه أبدا لازم تروح لشيخ يشوف مالها وبيها أيه
البت حلوة وخسارة تعقد لحد دلوقتي من غير جواز (وش مطلع لسانه)
أنا أعرف شيخ كويس أوي وهيعرفها مجرد ما يشوفها وهيعرف عليها كام عفريت
المهم أمي جت تقولي طلعت عفاريتي كلها عليها بجد واتنرفزت عليها وقولتلها أنا مش بقتنع بالكلام الفارغ ده ولا بالدجل والشعوذة دي وبعدين أنا لسة صغيرة وكمان أنا اللي برفض العرسان (وش مطلع لسانه تاني) ده طبعا كان من كاااااام سنة قالتلي ماهو ده شيئ يخوف ويخلينا نشك إنك مش عاجبك حد.
يا بنتي يهديكي يرضيكي مش هنخسر حاجة وبعد عياط وعصبية اخيرا وافقت...
وروحنا أنا وأمي ومرات خالي وكان اخويا قارف بابا شوية فأخدناه معانا جايز عليه كام عفريت هو كمان..
المهم مشينا مشوار طويييييييييييل علشان نوصل للبلد اللي فيها الشيخ اللي هيطلع العفاريت اللي عليا كل ده وأنا على أخري ومش طايقة ماما ولا مرات خالي وببصلهم على انهم ريا وسكينة.
وبعد عناء وعذاب طويل ومن بلد لبلد ومن نجع لنجع ومن كفر لكفر أخيراً وصلنا للبلد اللي موجود فيها الشيخ . ولما سألنا عليه لقيناه انتقل إلى إذاعة خارجية على الهواء مباشرة أي مااااااااات وشبع موت المهم أنا فرحت جدا وماما ومرات خالي وشهم بان عليه الزعل ورجعوا بادراج الخيبة والفشل.
واحنا راجعين بقى في الطريق مرات خالي مش عايزة ترجع البيت أبدا من غير أي إنجاز لازم تعمل حاجة تطلع بيها عفاريتي أنا وأخويا اللي ماشي معانا ومش فاهم هو في ايه!!!
وفجأة بصتلنا وقالت لنا أنا أعرف شيخ تاني أحسن من اللي مات ده واسمه
الشيخ (زعبلة).
رديت عليها بكل غيظ ونرفزة وقولتلها يخربيت كدااا
يطلع ايه الشيخ زعبلة ده كمان يا مرات خالي
ده شيخ كويس أوي يا نور عيني والبلد كلها بتروحله
يعني لو البلد كلها مجانيين نبقى زيهم يا مرات خالي؟ وكمان هي البلد كلها عليهم عفاريت؟ ما تسيبك من الهبل ده ويلا نروح أنا خلاص مش طايقة نفسي ولسان حالي بيقولها ولا طايقاكي...
المهم أخدتنا وروحنا للشيخ زعبلة
روحنا لقينا بيت قديم جداً من دورين وأصحابه شكلهم ناس على قدهم جداً
والدور الأرضي مقسوم جزأين...
جزء للرجالة وجزء للستات قصدي الرجالة والستات اللي عليهم عفاريت ودستووووووووووور ربنا يجعل كلامنا خفيف عليهم.
المهم دخلنا المكان اللي فيه الستات
ببص بعيني لقيت أوضة صغيرة ومليانة ستات على كل شكل ولون
فلاحيين ومتعلميين ومتمدنييين وبنات وستات وحاجات غريبة اوي
ولقيتهم كلهم قاعدين على الارض على شكل مربع جمب حيطان الأوضة وكل واحدة فيهم ماسكة ورقة بتقرأ فيها.
وفي وسطهم قاعد راجل على كرسي وماسك ورقة وقلم وحاجة كدة بيضرب بيها
راجل اجارك الله من شكله عمري ما خوفت من بني أدم قد ما خوفت من الراجل ده.. راجل ملقيتش في وشه أي علامة من علامات الإيمان وكان مكشر جداً وحواجبينه تقيلة اوي ونازلة على عينيه وبيتكلم بعصبية وقلة ذوق.
مجرد إني شوفته قلبي اتقبض ورجعت بضهري بسرعة واتاري مرات خالي واقفة ورايا راحت دفعاني بإيدها قدامه وقالتلي أدخلي متخافييييش يا شااااابة
لقيت اللي بصلي وقالي تعالي هنا يا بت

قولتله في عقل بالي بت في عينك ده انا ستك وتاج راسك قال بت قاااااال... بتشتكي من ايه؟
قولتله وأنا مرعوبة ووشي أصفر زي الليمونة: دايما معدتي تعبانة ولسة مكملتش كلامي...


لقيت اللي قالي انتي واكلة وشاربة ومخطية واقعدي هنا وخدي ورقة من دول اقرأي فيها لحد لما أقولك بطلي... أخدت الورقة بخوف وقعدت أقرأ في جمب وأنا نفسي أنفجر في العياط.
أقولكوا بقى واكلة وشاربة ومخطية يعني ايه؟؟
يعني حد عاملي عمل وحاطتهولي في الأكل أو في الشاي أو رشه قدام عتبة الشقة
والعجيب إني لقيته بيقول الجملة دي لكل واحدة تدخل وعلى الملأ كدة قدام الجميع يعني فضايح فضايح ومصر كلها عرفت اني عليا 6عفاريت
الورقة بقى كانت عبارة عن أيات قرآنية صغيرة جداً تقرأ وتكرر بالمئات المرات
مثلا على ما أذكر كان فيها حرف (ن) او (وألنا له الحديد) ده بالاضافة لكلام تاني غريب مكنتش فهماه
أما اللي عندها إبن شقي ومطلع عينها يقولها إنتي رميتي ماية سخنة في الحمام والجن بينتقم منك في إبنك
إقعدي في جمب وإفضلي كرري جملة (سامحوني مكنش قصدي)
اليوم ده كنت حاسة إني في كابوس
أيه اللي بيحصل ده... وفين عقول الناس دي... ده طبعا غير التليفونات الرهيبة كل شوية
قد كدة الناس مقتنعين بالكلام ده
يا ترى أنا اللي صح ولا هما
حسيت كأني في دوامة
المشكلة اني لما بتعرض لموقف زي ده بحس بصداع فظيع وضغط الدم عندي بينخفض واحس اني مش قادرة اركز ولا افكر واني مغلوبة على امري.
ده غير أعجب حاجة صادفتني يوميها
الراجل ده جايب ورقة وكاتب أسماء الموجودين عنده فيها
اسم البنت وامها وجدتها حتى لو كانت متوفية
ويكتب على كل إسم راح من عليها كام عفريت وجالها كام عفريت
المهم لقيته قالي انتي راح من عليكي ست عفاريت وجالك مش عارفة كام ومامتك راح من عليها كام وجالها كام
وجدتك راح من عليها 3 وجالها اتنين
نعم!! بيقول ايه الراجل ده
انا جدتي ماتت من كام سنة
عفاريت ايه اللي راحت من عليها وعفاريت ايه اللي جت
عرفت ساعتها واتاكدت اني صح وان كل ده كلام فارغ
وقال تجولي كل اسبوع مرة... انا وافقت بس علشان أرضي ماما وأشوف أخرة الكلام الفارغ ده ايه وبعد كدة امتنعت وقولتلها لو السما انطبقت على الارض مش هكرر المهذلة دي تاني
وروحت تاني يوم الشغل وكنت مضايقة جدا من اللي حصل انبارح وشارده وعمالة افكر جت صحبتي الانتيم وقالتلي مالك في ايه شكلك مش طبيعي فحكيت ليها على اللي حصل والهانم فضلت تضحك وراحت جرت على خطيبها وقالتله زهور عليها ست عفاريت وخطيبها سيحلي في الشركة كلها وهاتك يا تريقة ويقولي كل شوية بتقضيهم مكان ازاي دول طب حاطلهم كام سرير وببص الاقي كل اللي قاعدين جمبي قاموا يجروا وسابولي المكان قولتلهم تعالي يا تحفة انتي وهيا اقعدوا مكانكم عفريت لما يلهفك منك ليها
وكانت الفضيحة بجلااااااااااجل.....قولت لصحبتي ابقى اضربيني بالجزمة لو جيت قولتلك حاجة بعد كدة يلا بقى هيه والله لو ما سكتي هوصي عفاريتي عليكي يأدبوكي انا مش لواحدي يا ماما ده انا ورايا عفاريت ياكلوا الظلط (وش شريروناكش شعره ومبرأ عينيه) هههههههههه

أراكم مع حكاية تانية من حكايات دستووووووووووووور ياسيادنا.

هناك 40 تعليقًا:

نهر الحب يقول...

مش عارفة ازاي الحقيقة الناس لسه بيفكروا كدة

الحقيقة سواء فيه سحر واعمال وكدة انا شايفة ان الحل الوحيد ان الواحد يكون قريب من ربنا وميبعدش عنه وديما يكون معاه ويلجأله ومظنش حد يقدر يأذيه الا لو ربنا اراد ده

موضوعك جميل

romansy يقول...

ايه د بس
انا اندمجت مع كلامك وروحت فى عالم السحر والشعوذه اللى عيشتينا فيه
تعرفى ليه الناس بتعمل كده
بتتعلق فى ققشايه زى ما بيقولوا بس
كتير قوى قوى اللى بيؤمنوا بالطريقه دى وبيصداقوا بس انا معاكى ان فيه حاجات كتير من دى من اذى الناس

شمس النهار يقول...

دخلت برجلي اليمين

وقلت دستووووور ياسيادي

::))

العجيب ان اكتر المؤمنين بالناس دي متعلمين جداجدا

عموما هي تجربة انتي دخلتيها علشان تتعلمي وتبقي عرفتي العالم ده

وتكتبي البوست
وتعلمينا حاجه ننتفع بيها

ربنا يكفيكي شر الناس دي وضلالهم

سلامي

هاني مهران يقول...

الحقى نفسك بقى

انا اعرف شيخ اسمة سيكوموتو من اثيوبيا
بس ايه سره باتع

بصى ياستى
انتى معمولك بوست فى مدونة مخفية قديمة
ولازم عشان نلاقيها تعملى اكونت جديد
و ............



موضوع هايل جدا
الموضوع على فكرة بسبب الامهات والابهات اللى بيغالوا فى الطلبات

الامهات هى السبب
انا هعمل جروب على الفيس بعد كدة واسميه معا ضد الامهات التى تغالى فى متطلبات الزواج


تقبلى مرورى

مدحت محمد يقول...

على فكرة انا مرة اتعملى عمل ومش بخجل من ده

بس اللى عملهولى بقول فيه حسبى الله نعم الوكيل

كمان الرسول صلى الله عليه وسلم اتعملو عمل

اللى حابب اقوله
اننا مينفعش نربط كل شر بالعمل

يعنى فلانة متجوزتش معمولها عمل

بتتقال كتير

ممكن اه فعلا معمولها عمل وممكن لا

مش عيب انها تقرا قرءان وتصلى

وتحافظ على الاذكار عشان لو فعلا فيه عمل يتفك

على العموم مش حابب اطول

السحر هو تانى اكبر الكبائر بعد الشرك بالله

وياريت لو فعلا حد حس انه معموله عمل

يقرب من ربنا

وميروحش لدجالين لانهم بياذو مش بيعالجو

وربنا يحفظنا من كل سوء انه على كل شىء وكيل

Che يقول...

ربنا يجزيكى خير يا زهور ... انا قعدت اضحك على مغامرتك مع الشيخ زعبله ... طيب بذمتك و انا راذضى ذمتك ، ينفع اصدق كلام واحد اسمه زعبله .....هههههههههههه

أبو كريم يقول...

بسم الله

الناس بتتعلق بأى أمل يحققلهم مرادهم ولو كان ضد الدين...سبحان الله

ربنا يهدينا جميعا

تحياتى
أبو كريم

هيثــم رمضـــان يقول...

طبعاً كلنا بنؤمن زيك بوجود الجن ووجود السحر لكن الحل من الكلام ده سهل جداً وهو المواظبه علي أذكار الصباح والمساء وذكر الله عموماً ولازم كلنا نعرف إن ماحدش يقدر يضر أو ينفع إلا بإذن الله , لكن أصحاب المشاكل بيتعلقوا في قشايه والمشعوذين بيستغلوا إحتياجهم وقلة إيمانهم وينصبوا عليهم, وأخيراً ربنا يعينك علي عفاريتك ههههههههههه

تحياتي

MOHAMMED ELBANNA يقول...

زهور الامل
موضوع فعلاً جميل ورائع
وفعلاً المس الشيطاني حقيقه وبيأثر على البشر ولكن المهم كيف نتجنبه ونحفظ أنفسنا منه .
وكثيراً من المشعوذين يحتالون على البسطاء ويستغلون سذاجتهم لأستنزافهم مالياً وفكرياً .
وللأسف كثيراً من هؤلاء الزبائن من المثقفين أو من يدعون نفسهم مثقفين ونجوم مجتمع .
والحقيقه أن شفاء أي انسان من شرور الجن والشياطين هو ذكر الله والقرب منه .
قال رسول الله صلى الله عليه وسلم : ( لا تجعلوا بيوتكم مقابر ، وإن البيت الذي تقرأ البقرة فيه لا يدخله الشيطان )صدق رسول الله
تقبلي تحياتي على ابداعاتك وفي انتظار الجديد
محمد البنا
طريق النجاح

مدحت محمد يقول...

المدونة عندها امتحانات ولا ايه

























ولابتقفل فى الشتا

momken يقول...

الحقيقه مش هنكر ان معلوماتى فى الموضوع ده محدوده جداً تكاد تكون معدومه

بس الموضوع مثير جداً

بس الى انا اعره عن السحر بكشل مباشر

هو قول الله تعالى

بسم الله الرحمن الرحيم

(واتبعوا ماتتلو الشياطين على ملك سليمان وما كفر سليمان ولكن الشياطين كفروا يعلمون الناس السحر وما أنزل على الملكين ببابل هاروت وماروت وما يعلمان من أحد حتى يقولا إنما نحن فتنة فلا تكفر فيتعلمون منهما ما يفرقون به بين المرء وزوجه وما هم بضارين به من أحد إلا بإذن الله ويتعلمون ما يضرهم ولا ينفعهم ولقد علموا لمن اشتراه ما له في الآخرة من خلاق ولبئس ما شروا به أنفسهم لو كانوا يعلمون)

صدق الله العظيم

والى عرفته من الايه انه ما يسمى بسحر المحبه والكره او سحر التخيل

باى ترى الزوجه فى زوجها ما لا يسرها او العكس وهكذا

بدون ما ارغى كتير موضوعك مشوق جداً واسلوبك جميل وبكلامك حلو


تحياتى

إيمان قنديل يقول...

كلام فارغ
بصراحه ماعفريت الا بني ادم

كل الناس على اختلاف مستوياتهم الثقافيه بيهتموا بمواضيع الخرافات دي


تحياتي

♥نبع الغرام♥♪≈ يقول...

السلام عليكم

انا اهو عشان مش تزعلى منى حبيبتى

يارب تكونى بخير ويطمنى عليكى يارب

♥نبع الغرام♥♪≈ يقول...

موضوع جميل
بس للاسف دى الحقيقه اللى الناس كلها ماشيه وراها
ربنا يهدينا جمعيآ
وأحيكى على طرح مثل هذا الموضوع يا زهزر
ربنا يطمنى عليكى حبيبتى
ومنتظراكى عندى عشان تشاركى بالبوست ععلى شقاوه
دمتى بكل خير
ايناس

غير معرف يقول...

جميل أوي كلامك .. ما شاء الله .. نمسك الخشب .. مصر بقا فيها كتاب محترفين كتير

لو تشرفيني في مدونتي المتواضعه أكون شاكر بجد

و نفسي و الله نبقا اخوات و نتبادل التعليقات على الكتابه و الأفكار

رابط مدونتي

http://ra7alaat.blogspot.com/

متشكر لوقتك

جارة القمر يقول...

حبيبتي وحشاني

بجد انا اسفة على التأخير

بس كنت تعبانة وكان عندي دور برد

اتشششششششششششششششششششششششي

ههههههههههههههههههه

الموضوع تحفة انتي عارفة انا احيانا بيكون عندي فضول اروح للناس دي

بس ارجع واخاف

الموضع جد خطير ومحتاج لمناقشة

فعلا اكتر المتعلمين هما اللي بيلجئو للدجل والشعوذة

طيب مالجئوش لربنا ليه

حاجة غريبة

وبيكون ردهم السحر مذكور بالقرآن

مش عارفة

الله يهديهم يارب

هيفاء عبده يقول...

العفاريت لا تتلبس الناس العسل الذين بمثل (زهور الأمل )
بذكر الورد يومياً واذكار الصباح والمساء
ومحو فكرة العفاريت هذه من الاذهان ، لا اعتقد انه سيكون هناك اي عفريت يجرؤ على انسان ..
وآخراً.. الله خير حافظ وهو خير الحافظين

علي فكرة يا زهور انا اكتشفت انه دمك خفيف وزي العسل وسردك للقصة ممتع للغاية ...يكفي انك رسمتي البسمة
في حفظ الله يا رائعة ...(f)

ذو الوجه المبتسم يقول...

السلام عليكم
الموضوع فعلا يستحق الدراسة والمتابعة
لانه منتشر جدا فى الفترة الاخيرة وكان زمان برده كده

المهم بتقولى طلعتى عفاريتك على ماما
طيب ازاى مش مقتنعة بالعفاريت هههههههههههههههه
وكمان بتقولى مرات خالك قالت البت حلوة ... مين قال الكلام ده دي بتضحك عليكي ههههههههههههههه

تقبلى تحياتى واحترامى

نغم يقول...

السلام عليكم اولا اسم مدونتك جميل جدا احب اهنيكى عليه
ومعاكى جدا فى كلامك عن الدجل والسحر صدقينى كتير جدا من الامهات بيدوروا على حل عقد بناتهمبالطريقه ديه لانهم بيشوفوا ان مفيش سبب يعطل فكرة الجواز غير ان فى شئ خارق للطبيعه
ربنا يلطف بينا ويهدينا جميعا لما يحبه ويرضاه
نغم

المسلم الصغير يقول...

السلام عليكم ورحمة الله وبركاته...
ازيك الأول وعاملة أيه؟
بجد وحشاني قوي
موضوع حلو قوي وبجد بحيكي علية
(كذب المنجمون ولو صدقوا)
دومتي بخير

صدفة جميلة يقول...

اقول السلام عليكم
اخبارك واخبار اخواتك من العفاريت يارب يكونوا بخير
الانسان هايفضب على مر العصور ينكر انه هو خطأ ويرجع سبب خطاه الى اى شيىء عفاريت انس جان المهم مش هو والسلام
المهم ربنا يحفظك

د/ أحمد لاشين يقول...

تصدقي دستورهم احسن من دستورنا :):):):)
عالاقل دستورهم خرافة في عقول من يصدقهم ووزر علي من يذهب لهم
اما دستورنا فهو خطيئة تحتاج لجراحة استئصالية تستأصل المواد الاستبدادية منه
معلهش بواقي هلوسة عندي :):):):)

سمكه واحده يقول...

ده لو علي كده يبقي الواحد عليه عشرتاشر عفريت من وهو صغير
امال الحجات اللي كان بيعملها والشقاوه دي تبقي ايه؟
لا وكله كوم والرقص ادام المرايا هه واخده بالك اظن مفيش ولا بنت وهي صغيره ممرتش بالموقف ده وخصوصا ادام المرايا متعرفيش ليه يبقي الواحد اتلبس اتلبس مفيش مفر

طبعا انا مؤمنه بالحسد والجان لانه ذكر في القرأن
بس مش مؤمنه بالخزعبلات دي واي مشكله تحصل لنا نتهم في العفاريت
ماعرفيت الا بني ادام
طب انا اكاد اجزم ان احنا غلبنا الشياطين والعفاريت وحياتك
كمان اي سحر او حسد او اي مشكله من الكلام ده
قرأه القرأن الكريم والحفاظ علي الصلاه والاورده اليوميه تحفظ الانسان من اي مكروه
لا شيخ زعبله ولا الشيخ حلاطه انا مش بأمن بالكلام ده ومفيش حاجه اسمها كده
في ثقه في ربنا في عزيمه من جوانا في نحمي نفسنا بنفسنا ونثق في الله ونقرب منه
اعتقد انسان بيصلي الوقت بوقته بيتقي الله محافظ علي الورد اليومي
بيقرأ القرأن
الله خير حافظ
بس ده الحل
وسيبك من زعبله اسمع انه مش تمام
(.
اخبارك ايه ياجميل؟

blue-wave يقول...

بعد الناس عن الدين هوا اللى بيسمح للخرافات دى انها تملى عقولهم
ربنا يعافينا

صفــــاء يقول...

اسكتى الموضوع الاسود دة
له معايا افلام
وعقول غريبه بأفكار ماتعرفيش بتفكر ازاى
وكلام ومواقف نكت يااختى
حتى كنت قولت مرة على موقف يشبه لموقفك دة
http://safagalal.blogspot.com/2009/12/blog-post_15.html
وبدل ما الشيخ هو اللى يطلع العفاريت اللى عليا
لبسته انا عفاريت الارض وطلعت البلا على جتته
كبرى دماغك وخليكي فى المواقف دى على انها كوميديه وفكاهيه
احضرى ونكتى
جميل يا قمر وانت واحشتينى جدا

عاشق الجنة من الإخوان صلى على النبى يقول...

بصراحة الامهات ربنا يعينهم ويقويهم
بجد موضوع صعب
بس للأسف التعامل مع الموضوع بيتم بطريقة خاطئة تماماربنا يصلح حال المسلمين
صلي علي النبي

TWEETY يقول...

ايه الكلام الكتير دا ياابلة
بس انا جيت ازور المدونة

وهستنى حضرتك تزورينى

حياه بلا عنوان يقول...

السلام عليكم ورحمه الله وبركاته
الموضوع جميل فعلا ومهم جدا فى الزمن ده دى فعلا مشكله اى بيت واى ام كل ام بتزعل وبالتالى تلجىء لحاجات دى زى ماتقولى بيقولو بيمسكو فى اى اشايا علشان يحولو يعملو حاجه بس الحكايه كلها فى ايد ربنا سبحانه وتعالى
تحياتى

سمكه واحده يقول...

زهزر فينك؟
مفتقداكي جدااااااااااا

Rosie يقول...

عجبنى اوى أسلوبك..شدنى من الأول للآخر..بجد بجد انا مش متخيلة ان الناس بتطلع القمر و بتجيب عينات من المريخ و احنا لسه بنقول مياه سخنة فى الحمام و عفريت ورا و عفريت قدام..بجد آاااخر تهريج..ربنا يهدى..و بصراحة كحل عملى لازم كل واحد يعرف حد بيفكر بالطريقة دى لازم يحاول يقنعه..و ربنا يهدى الجميع..

top-fn يقول...

دوماً ما يعجبني عرضك للمواضيعـ

واسمحي اعرض رأيي :

برغم ممما فهمتهـ ان ما دفعكـ لخوض هذه التجربهـ مجرد فضول وليس تصديق او اقتناع بهذا الشئ ، الا اني لا اؤيد ما فعلتي وذهابك للشخص دهـ طبعاً رايي شخصي ولهـ اسباب :

اولا : الشخص ده مش يعرف الغيب ولا يعرف شئ وهم لهم عملاء من الجن يسترقون السمعـ ويخبرون به الاشخاص الذين يأتونهمـ ويتكهن بالكلامـ

ثانياً : حضرتك برضه غلطانه انك قرأتي كلام مش تعرفي معناهـ لان فى كتير سحر وأعمال بيتعمل بالطريقه دي ، وانا سمعت فى دول الخليج بيعمل اعمال بالطريقه دي

ثالثاً : قال النبي صلى الله عليه وسلم: (من أتى كاهناً فصدقه بما يقول فقد كفر بما أنزل على محمد). وإنما كان ذلك كفراً لأنه تكذيب لقول الله تعالى: (قُلْ لا يَعْلَمُ مَنْ فِي السَّمَاوَاتِ وَالْأَرْضِ الْغَيْبَ إِلَّا اللَّهُ) .

خالص تحياتي ،،

قيس بن الملووووح يقول...

نحن في حاجه الي رأيك في مشاكل القراء بمدونة "دقات قلب بعد الخمسين"
مع خالص تقديري

قيس بن الملووووح يقول...

نحن في حاجه الي رايك في مشاكل القراء علي مدونة"دقات قلب فوق الخمسين"

المسلم الصغير يقول...

السلام عليكم ورحمة الله وبركاته...
ايه يا بنتي فينك ؟!
يا رب يكون المانع خير
بس بجد وحشتيني
للعلم انا بنت لحسن تفهميني غلط ههههههههه

TWEETY يقول...

ازيك ياطانت
انا مبسوطة خالص انى زرت المدونة
انا جيت اسلم على حضرتك
واقولك انى عاملة حفلة ابقى تعالى زوريها ماشى
انا همشى عايزة حاجة
مع السلامة

اميرات الاسرار يقول...

السلام عليكم
بجد موضوعك ده فى غاية الاهميه ومدونتك مواضيعها جميله قوى

ممكن تشرفينا فى مودونتا المتواضعه


تقبلى مرورى

حياة يقول...

الناس اللي لسة بيفكرول كدة دول ملهمش ذنب
لأنهم غالبا بيبقول ناس غلابة و تعليمهم مش قد كدة
وكمان مفيش جن ممكن يأذي حد بيقرأ قرآن وعارف ربنا
مدونتك حلوة اوي انا قريت كذا بوست وكلهم حلوين
واتمنى تشرفيني في مدونتي عشان هي لسة جديدة

مدحت محمد يقول...

انتى فين يابنتى طمنينا عليكى

غير معرف يقول...

لما سمى بنات الدعارة ببنات الهوى الالهوى النفس الامارة بالسو ءلن يصلح الله امورنا الا لو امر الحكام العرب بالقضاء عليها

jahmicaesar يقول...

Find out how to find a good casino in Mississippi. - Dr. Maryland
If you're looking for a good casino, we've got you covered! Read 천안 출장마사지 reviews, compare ratings, and 세종특별자치 출장안마 find a 원주 출장안마 list 김포 출장마사지 of the best 이천 출장샵 casinos in Mississippi.