الثلاثاء، 1 ديسمبر، 2009

هــي حكــــاية

video

السلام عليكم ورحمة الله وبركاته

أنا عايزة أتكلم معاكم انهارده في موضوع خطير أوي، آفة من الآفات اللي لها القدرة الكاملة على تدمير مجتمعات بأكملها وتدمير مستقبلها، آفة انتشرت بين المراهقين والشباب حتى العواجيز والمسنين
آفة لم تترك أي مستوى من مستويات المجتمع غير لما دخلته واكتسحته بقوة ومش بس في مصر بل في العالم أجمع، آفة تهدد مستقبلنا ومستقبل بلدنا وشبابنا كله
ليها أسباب كتيرة : جايز الانحلال والتفكك الأسري، جايز الفقر، جايز البطالة، جايز الثراء الفاحش، جايز توقف الحياة إلى حد معين بالنسبة لكثير من الناس، جايز الفشل، جايز تأخر الزواج عند كثير من الشباب، جايز المشاكل الإجمتاعية الكتيرة اللي بنواجهها،جايز الرفاهية الزائدة عن الحد، وجايز وجايز وجايز تعددت الأسباب والموت واحد
كل المشاكل دي بتدفع الكثيرون للجوء لهذا السم القاتل والمدمر لكل شيء للمال والصحة والمستقبل والحياة بأكملها.
أكيد أنتو عرفتوا أنا عايزة أتكلم عن أيه

الإدمااااااااااااااااااااااااان
الإدمان أنواعه كتيرة أوي
منه إدمان المخدرات – إدمان النت – إدمان التليفزيون – إدمان الجنس.... إلخ
بس الإدمان اللي أنا عايزة أتكلم عنه هو إدمان المخدرات
اللي المعظم متجاهلينه ويعتبرمن أخطر أسلحة الموت والدمار ومن أخطر أنواع الإدمان الموجودة
جايز وسائل الإعلام بتنوه عنه كتير- جايز فيه إدارة في وزارة الداخلية اسمها إدارة مكافحة المخدرات – جايز بيجي إعلان صغير أوي في التليفزيون بيقول يا جماعة كدة غلط كدة كخ أوعى حد يتناول مخدرات
كل دي سبل لمكافحة تعاطي المخدرات لكن مش بالشكل اللي تستحقه هذه القضية الخطيرة والمدمرة
بيتهيألي لما أبقى واقفة في البلكونة بالليل وأبص ألاقي مجموعة شباب ماشيين في الشارع متعاطيين بانجو وحشيش وماشيين يقطعوا الطريق على اللي رايح واللي جاي يبقى لازم أتكلم
ولما أبقى داخلة محل أشتري حاجة وأبص ألاقي ذبون واقف جمبي متعاطي مخدر وواقف يهرتل في الكلام يبقى لازم أتكلم
ولما أبقى راجعة من شغلي وألاقي شاب متعاطي مخدرات وبيشد بنت ماشية في الشارع وعايز يدخلها عربيته بالعافية يبقى لازم أترعب وبرضو أتكلم
ولما أعرف إن رائد شرطة نزل هو والعساكر بتوعه في حمله علشان يمسكوا الشباب اللي بيتعاطوا مخدرات في الشارع وتحدث مشاجرة بين الشباب والشرطة والشباب يطلع منهم ظابط جيش يهيين ظابط الشرطة ويهدده إنه هيوديه في داهيه يقوم ظابط الشرطة يقوله أنا أسف لسيادتك بس سيادتك لما تحب تشرب بلاش تشرب في الشارع علشان كدة غلط أنا عن نفسي بشرب وإخواتي كلهم بيشربوا بس مش في الشارع
يا عيني يعني المشكلة كلها إنه في الشارع
يبقى في الحالة دي لازم أصرخ وأقول لالالالالالالالالالالالا
كفاية بقى ضياع
إزاي هنبني مستقبلنا وإحنا سكرانيين
إزاي هننهض بالبلد دي وإحنا مش فايقين
إزاي هنرجع قدسنا وإحنا متخدريين ومش في وعيينا
يا أمة محمد فوقي بقى وارجعوا لدينكم يا شباب
يا أولى الأمر منا إزاي هتحمونا وإنتم مش فايقيين وبتسمموا دمكم بالسم ده وكمان بتشجعوا الناس عليه
يا أباء هتربوا أجيال إزاي وإنتم متخدرين
الموضوع مابقاش متوقف على السيجارة فقط
الموضوع بقى بانجو وحشيش وهيروين وخمرا وبلاوي كتيرة أوي
وبرضو مابقاش متوقف على الشباب فقط
ده شباب ومراهقين ومسنين وعواجيز وجميع الأعمار
أمال الأجيال القادمة هتتعاطى أيه بقى
جرايم السرقة والإغتصاب والقتل ذادت أوي وكلها تقريباً بسبب تعاطي المخدر وبالمخدر ده بنهرب من مين وعلى فين
وكل ده من أوله لأخره سببه بعدنا عن الدين وعن ربنا وعن سنة نبينا محمد صلى الله عليه وسلم بعدنا عن قرآنا واعتراضنا على قضاء الله وقدره

أنا عارفة إني طولت عليكو وكتبت الموضوع ده وأنا في قمة عصبيتي بس اعذروني كان لازم أصرخ واقول لا كفاية بقى ضياع

وياريت تقرأوا كلمات الغنوة دي وتشوفوا الكليب كمان
بجد هيأثر فيكوا أوي زي ما أثر فيا وهزني من جوايا جامد

هي كلمات مصطفى كامل وغناء مجموعة فنانين


هي لا قصة ولا حدوتة ولا فزورة ولا بنسود شكل الصورة



هي حكاية
.
.
هي حكاية

ناس عايزينا نعيش بالموت ويفضل قطر العمر يفوت
وتيجي في لحظة وتكسر بابنا وتبدلنا وتغيرنا وتعذبنا وتدمرنا
وتفرقنا عن أحبابنا زي ما حاصل في فلسطين

والمفروض على قد حسابنا اللي هيحمي الأرض شبابنا
اللي بإذن الله وبأمره وبقوتهم وبإصرارهم
باسم الله كان هو قرارهم والرد لكل اللي إتأمروا
6 أكتوبر رمضان في 73


واللي اتحدى النار والسور ناس كان جوا قلوبهم نور
لسة أنا وأنت بنفخر بيهم
ابني واخويا وأبوك وأبويا
ناس كانوا لسة بتطرح فيهم صرخة قلب صلاح الدين

كل رسايل موسى وعيسى ومحمد للبنيأدمين
بتحرم على قلب المؤمن يظلم روحه يظلم نفسه يخسر دنيا وأخرة ودين

اللي حقيقي في قلبه إيمان عمره ما يبقى ضعيف وجبان بينا شيطان اسمه الإدمان بيدمر في حياة ملايين
كسر الحلم في قلب شباب عيشهم في أمل كداب أياً كانت أيه الأسباب ليه لو متنا نموت كافرين
ربنا ماخلقناش نعصاه لا في انجيل ولا في التوراه هات قرآنك هات وإإراه قوله يا رب وقول يا معين
بسم الله والإيد في الإيد نبدأ من أول وجديد حتى إن كان الحلم بعيد لسة كتير أحلام جايين


بدل الموت بسلاح ملعون يلا نقول هنكون ونكون لو عايزين الصعب يهون لازم نتمسك بالدين
إوعى تقولي ماليش أحلام إوعى اليأس والاستسلام يلا سوا نبص لقدام فكر في أولادنا الجايين
مين هيفرح أمه وأبوه غير اكتر إنسان حبوه لما أنا وأنت يا صاحبي نتوه الناس دي هتسند على مين
يلا نعيش ونموت أحرار نجري ورا الحلم بإصرار ندعي يارب نكون أنصار سيدنا النبي في العليين
اختلفت لغة الإنسان واتفرقنا في كل مكان واتفقت كل الأديان إننا يوم لله راجعين


يلا نصلي على طبيبنا سيدنا النبي طه حبيبنا قبل شيطانا ما يغلبنا هات المصحف نقرا يس


كلنا ليك مادين إيدنا ومحتاجينلك تساعدنا عايزين نصلي صلاة عيدنا أنا وأنت في قدس فلسطين

كلمات مصطفى كامل

هناك 67 تعليقًا:

الزنارى يقول...

السلام عليكم
فى الحقيقة هى افة خطيرة جدا و أخطر من الخطورة فبها ستهدم الأمة جميعها .
لا للادمان و المخدرات هكذا يجب أن يكون شعارنا .
مع خالص الاحترام و التقدير
أحمد الزنارى

غير معرف يقول...

بلاش سرقة افكار ومجهود غيرك

ساعد على عدم سرقة الافكار


فية ناس بتسرق مواضيع من منتديات ومدونات وتنسبها ليها وفية مواضيع فى مدونات مسروقة من منتديات

فى مدونة عاشقة الاحزان ايناس

فية موضوع باسم ملاك الروح حبيبى

مسروق من منتدى تعب قلبى

http://forum.te3p.com/27986.html

http://froum.com/27986.html

ومنتديات مكتوب وكان مكتوب فى المنتدى بتاريخ 19/6/2009 قبل مايتنشر عندها فى المدونة

http://support froum.maktob.com/showthred.php?=454

وموضوع بعنوان معنى الوفاء مسروق من منتدى تعب قلبى

http://forum.te3p.com/304846.html

واغلب المواضيع اللى على مدونتها مسروقة من منتديات الفرق انها بتغير عنوان الموضوع علشان محدش يشك


بلاش نسرق مجهود غيرنا

MOHAMMED ELBANNA يقول...

زهور الامل
فعلاً موضوع مهم جداً
والظاهرة دي انتشرت بين شبابنا وبناتنا
ربنا يستر على الجميع
تقبلي مروري
محمد البنا
طريق النجاح

سمكه واحده يقول...

يااااااااااااااريت يازهور
نفسي افتح واغمض
او اغمض وافتح
او زي ما تشوفي انتي يعني
والاقي مفيش ادامان
مخدارت او نت وخدي بالك من دي كلنا بقينا مدمنين نت
ولا ادامن من اي نوع ياشيخه
وخاصه الهباب ده المخدرات اللي بوزت عقول الشباب
فكرتيني بموقف زمان وانا صغيره كنت واقفه في البلكونه مع ناس قريبي عند وكانت الساعه 3 بليل بنلعب المهم لقتلك راجل عجوز بيتطوح وصوته عالي جدا كنت اول مره في حياتي اشوف حد سكران واخر مره مشوفتش بعدها
كان عمال يغني اغنيه غريبه سألت ماما عليها لما روحت البيت
عمال يقول ياحليوه ياحليوه ياحليوه
وصوت الراجل يضحك قمت انا حدفاه بمشبك علي راسه ووطيت استخبيت كنت صغيره معرفش بقي انه مش في وعيه لا واخد باله انه اتخبطت ولا متخبطش بس صدي صوته كان عالي جدا ولما لقيت المشبك مأثرش روحت مليت كيس مايه وجريت بسرعه وهوب مفرقعاه جنبه في الشارع الراجل نط من مكانه وقعد يشتم بقي من مالز وطاب وانا صوتي سمع المكان كله من الضحك
موضوعك جميل يازهور
ربنا يحمي بلدنا ويهدي الشباب
كل سنه وانتي طيبه يا قمريه
ليكي وحشه

الشجرة الأم يقول...

السلام عليكم ورحمة الله وبركاته ..

إن من أكثر المشكلات التي أسهمت في خلخلة المجتمعات العربية والبشرية بشكل عام هي آفة الإدمان بشتى أنواعه سواء المخدرات أو المسكرات أو القمار أو الجنس أو غيرها من الآفات الهدامة للإنسانية بشكل عام ..

موضوع جدا قيم بارك الله فيك ونفع الله بك الأمة الإسلامية العربية..

وعلى فكرة الغير معرف دا داير على كل المدونات وحاطط نفس التعليق يمكنك حذفه لو أردته لأنه شخص واطي جدا ..

blue-wave يقول...

واة واة من الإدمان
موضوع جميل
بس العلاج صعب اوى

blue-wave يقول...

دا علاج وطن بحاله
يا ترى ممكن؟؟

هيثــم رمضـــان يقول...

إزيك يا زهور وكل سنه وإنتي طيبه بصراحه الموضوع مهم جداً وإنتي إتكلمتي في كل الجوانب وأهما هو غياب الوازع الديني لمن يدمن المخدرات وكمان الهروب إلي حالة الاوعي للتخلص من مشكلات الحياة بكل أنوعها, وكمان ضعف النفس البشرية بيساعد إن المدمن يصبح عبد للشيء اللي بيدمنه.
الحل هو الرجوع للقيم الدينية والاخلاقيه في البيت والمدرسة والأهتمام بتربية الأطفال علي أسس وقواعد متينه لمساعدتهم مستقبلاً علي مواجهة مشاكلهم دون الهروب منها أما عن المدمنيين الحاليين فلابد من وجود إراده قوية وعزيمة صلبه للتخلص من هذا الادمان ويارب يحفظ المسلمين من كل سوء.

تحياتي

الحــ ــزين يقول...

الحــ ــزين
وانتى طيبة ياقمر
وكمان والله باعزك جدا
بس زعلان منك علشان احنا من بلد وحدة والمفروض نتعرف أكتر من كدا
دومتى بكل خير وحب

كلام من قلبي يقول...

هية فعلا مشكلة جمدا جدا واذا ما وجهنهاش ووقفنا قدمها هتنتشر اكتر وتقضي على المجتمع

micheal يقول...

الكلمات قوية ومعبرة جدا
ربنا يكفي الجميع شر الادمان
تحياتي

مي يقول...

الله يازهور فعلا موضوع مهم جدااااااااااااا المفروض ننتبه ونصحصح بس انتشر اوى وربنا يبعد الشر عننا كلنا
الكلمات صعبة اوى والكليب تحفة تسلم ايدك بجد
تحياتى لابداعك

اقصوصه يقول...

الله يعيننا ع بلاوي هالزمن

والله يحفظ شباب المسلمين :(

هيفاء يقول...

المخدرات هي آفة المجتمع
والله يحفظ شبابنا ورجالنا من شرها

تحية كبيرة لرقي فكرك
دمت بود

sweet angel يقول...

معرفناش نعلق من الكمبيوتر نجرب الموبايل
الإدمان ده حاجه انتشرت بصوره فظيعه
وحلها هو الأصعب
دي مشكله مجتمع كامل يعني حلها يعد من المستحيلات وخصوصا بقا إن الي عاوز الغلط بيعمله يعني لو حتى الدوله شددت الرقابه وعاقبة المدمنين بالإعدام
بردو المدمن هيفضل مدمن
تقبلي مروري
تحياتي

Rosie يقول...

زهور الأمل
الموضوع فعلا انتشر و مهما عالجنا فيه مش هيخلص لأننا المفروض نعالج الأسباب اللى فى الأول خليته ينتشر...الناس المخنوقة اللى مش لاقية تاكل ..و اللى بيطلقوا و اللى مش بيتجوزوا...التلفزيون اللى بيجيب اللمثلين ماسكين الكاس كأنه كوباية مياه..حاجة تقرف بجد..الواحد بقى بينزل الشارع مرعوب من الناس العادية ما بالك الشاربة..و الشامة...

زهور الامل يقول...

الزناري

فعلا عندك حق
المفروض نضع هذا الشعار في كل مكان
على الاقل حتى نذكر اللي مش واخد باله ان ده خطأ كبير

متشكر جدا على الزيارة ومنورني

تحياتي

زهور الامل يقول...

MOHAMMED ELBANNA

فعلا هي انتشرت وبصورة متوحشة جدا ولازم يكون ليها حد لاننا لو تركناها كدة قول على الامة السلام

منورني جدا يا محمد
تحياتي

زهور الامل يقول...

سمكة واحدة

سمكمك
ازيك يا قمر وحشاني جدا
انتي فين يا بنتي بتظهري فجاة وتختفي فجاة ليه كدة
ولا منكمشة من البرد والساقعة

انا برضو زيك يا سمكة نفسي اغمض عيني وافتحها الاقي مفيش حاجة اسمها ادمان
والاقي الكلمة دي اتشطبت من قاموس الحياة خالص
ربنا المستعان بقى على انه يزيل عنا الغمة دي
وانتي مش عايزة تبطلي اذية في الناس
افرضي الراجل كان ركبه عفريت ولا حاجة من الخضة يعني
كنا هنجيبله طاسة الخضة منين في الساعة دي
ههههههههههه
منوراني يا قمر

زهور الامل يقول...

الشجرة الأم
وعليكم السلام ورحمة الله وبركاته

عندك حق الادمان غرق حياتنا وبشتى انواعه بس اخطره ادمان المخدرات اللي بيؤدي في معظم الحالات الى ادمان الجنس والانواع الاخرى من الادمان

ربنا يسترها على هذه الامة وينجدها مما هي فيه

متشكرة جدا على الزيارة الغالية دي

تحياتي

زهور الامل يقول...

blue_wave

ازيك يا دكتور عمرو

فعلا هي مصيبة وطن وامة بحالها
واحنا نقدر فعلا نتعالج منها بالارادة القوية والتوعية الصحيحة وقربنا من ربنا

منورني جدا

تحياتي

زهور الامل يقول...

هيثم رمضان

ازيك يا استاذ هيثم
كل سنة وانت طيب وبالصحة والسلامة

انا في اعتقادي ان الناس اللي بيلجأوا للادمان دول ناس ضغلف الشخصية وبيبقوا عبيد للادمان او اي ادمان اخر
بيحاولوا يهربوا من مشاكلهم بتعاطي المخدرات
بيعتقدوا ان ده ممكن يحللهم مشاكلهم او يخليهم ينسوها ولكن للاسف هما بيذودوا مشاكلهم بالادمان وبيقضوا على حياتهم كلها

تعليقكك افدني كتير
ومنورني دايما ورافع معنوياتي

تحياتي

زهور الامل يقول...

الحزين

ازيك يا محمد
اخبارك ايه يا قمر

يارب تكون كويس وبخير
انا مبسوطة اوي انك رجعت للتدوين ورجعت بين اصحابك تاني في عالم بلوجر

وبعدين متزعلش مني والله انا مشغولة جدا حتى بقالي فترة مش فاضية ارد على التعليقات
واكيد مسيرنا في يوم من الايام هنتعرف وهيكونلي الشرف طبعا

تحياتي يا قمر

زهور الامل يقول...

كلام من قلبي

فعلا عندك حق لو مش واجهنا المشكلة دي هتتفقم اكتر وتكبر وتدمرنا وتبعدنا عن كل حاجة بنحبها
ربنا يستر

متشكرة جدا على الزيارة

تحياتي

زهور الامل يقول...

micheal

ازيك يا مايكل

ربنا يسمع منك يا مايكل ويكفينا شر كل انواع الادمان ويحمي البلد دي من الضياع

منورني دايما

تحياتي

زهور الامل يقول...

مي

ازيك يا مي
ريحة ورودك مالية عالية المدونة ربنا مايحرمنيش منك ولا منها ابدا

انا كتبت في الموضوع ده لاني لقيته انتشر جدا واصبح واقع مؤلم في حياتنا ولما شوف الكليب ده بالصدفة وسمعته غصب عني بكيت لقيت كلماته مؤثرة اوي وهزتني جامد

ربنا يسمع منك ويبعد عننا الشر ده
اللهم امين

منوراني جداااااا

تحياتي

زهور الامل يقول...

اقصوصة

اللهم امين ويسمع منك ربنا ويحمي امتنا جميعا ويهدينا الى الرشد والثواب

منوراني جدا

زهور الامل يقول...

هيفاء

اللهم امين يا هيفاء وربنا يسمع منك ومنا ويحمينا ويحمي امتنا كلها لان الادمان اصبح منتشر بين جميع الاعمار

عطرك دايما مالي عليا المدونة وبيسعدني وجودك فوق ما تتصوري

منوراني جداااا

تحياتي

زهور الامل يقول...

sweet angle

فعلا هو انتشر جدا وحل المشكلة بقى صعب بس مفيش حاجة اسمها مستحيل قدام الارادة والعزيمة والتربية الصحيحة والنشاة على الدين والايمان بالله

وربنا يسترها علينا جميعا ويكفينا شر هذا البلاء

تحياتي

زهور الامل يقول...

rosie
والله يا روزي عندك حق في كل كلمة قولتيها
المسلسلات والافلام دي هي اللي ودت الامة في داهية
الشباب بيقلدوا كل ما يحدث في التليفزيون سوء لبس او ادمان او جرايم
وفعلا المفروض نعالج الاسباب ونصحح تربية اولادنا ونربيهم على النشاة الصحيحة علشان نقدر نعالج مشكلتنا

منوراني يا قمر

ذو الوجه المبتسم يقول...

السلام عليكم

بجد الموضوع والحكاية مؤثرة جدا

ربنا يهدينا لما فيه الخير


كل سنة وانتى بخير

الحــ ــزين يقول...

سيبك من الناس التفهة اللى ديما مش لقيه حاجة تتكلم فيها دى وبيدخلو بغيير معرف
نيجى للمهم انتى عندك حق جدا فى اللى انتى بتقوليه دلوقتى كل شطح مش لاقى شغل
بيفكر انو يبقى مدمن أقرب من انو يلاقى شغل
والناس الكبيرة كمان بقت تفهة والله الناس أكترها بيهتمو بحجات ملهاش اى لازمة فى حيتنا
عموما ونعم الاختيار
دومتى مبدعة

TWEETY يقول...

ازيك ياابلة

انا جيت اسلم عليكى

ameen يقول...

الحمد لله على المكان اللى انا فيه

مش هنشوف حكايه الادمان دى كتير
ولو انها ظاهره وموجوده

بس رغم كده مش هتبقى زى مدن تانيه كتير

وفعلا عواملها زى ما شرحتى بس ضيفيلها الاستعدا النفسى بتاع الشخص



تحياتى
!!

المسلم الصغير يقول...

السلام عليكم ورحمة الله وبركاته...
ازيك يا زهور عاملة اية؟!
موضوعك حلو قوي وبجد في غاية الأهمية لأن بجد الظاهرة دية كترت قوي وخلاص مبقاش فيه امان في الدنيا لأن ذي ما أنتي قولتي الحكومة ذات نفسها بتشرب يبقى فين الأمان اللي الناس المفروض يحمونا
ربنا يسترها علينا من عجائب هذا الزمن
تحياتي...

مدحت محمد يقول...

الموضوع خطير

وعندنا بصراحة فى السويس

مفيش اكتر من المخدرات

بصراحة والله

من شهور قليلة السنة دى ظابط اتقتل من عصابة مخدرات فى وسط البلد عندنا

والخبر اتذاع على الجزيرة

كان فى رمضان تقريبا

ووقتها اتكلم عن الموضوع ده عمرو اديب

momken يقول...

موضوع رائع وجميل

عارفه المشكله ان فى تلاته مش فهمين انهم محتاجين مساعده

الشخص الى بييحب جدا متبهدل فى عشقه والناس كلها شيفاه تعبان وهو مش حاسس من شده العشق
والشخص المجنون شايف انه اعقل واحد

والمدمن شايف ان هو بس الى دماغه عاليه مظبوطه واننا مش عايشين صح (طبعا علشان دماغنا واطيه)

ربنا يهدى الجميع
ونعرف اولوياتنا

الغريب بقى جداً ان اغلب المثقفين وكمان الادباء والفكرين مدمنين
واغلب الفنانين طبعا

مدمنين على مخدرات وخمور وحجات تانيه كتير
وهما دول قدوة اليومين دول

ولما تضيع القدوة يضيع معها كل شىء

تقبلى تحياتى

ضحكات الحياة يقول...

السلام عليكم
فعلا يا زهور الموضوع ده بقي حتي تجاوز الضرر لحد ما بقي الموضوع غريب
لأنك بتلاقي المخدرات دي بتباع في كل مكان طيب فين مكافحه المخدرات هتقولي ترجعي تلاقي فساد طيب تقولي ليه الشباب كده تقولي بطاله عدم القدره علي الزواج تقولي الاحلام جواهم ماتت الاسباب كتير و العلاج طويل بس الاهم ان احنا نبدأ فيه

بوست رائع و جميل و اغنية تحفه بجد
دومتي مبدعه رائعه

طهر فؤادك يقول...

السلام عليكم ورحمة الله وبركاتة

اخبارك اية

ربنا يكرمك يارب والمسلمين واحب ابشرك ان فية حملة جديدة اسمها " اكفلة هيدخلك الجنة " فياريت تشاركينا فيها وهى منطلقة من المدونة لو تحبى تتطلعى عليها ...

طهر فؤادك يقول...

السلام عليكم ورحمة الله وبركاتة

اخبارك اية

ربنا يكرمك يارب والمسلمين واحب ابشرك ان فية حملة جديدة اسمها " اكفلة هيدخلك الجنة " فياريت تشاركينا فيها وهى منطلقة من المدونة لو تحبى تتطلعى عليها ...

حـــــــــــب الملائكه يقول...

السلام عليكم
اننى عندك حق فى كل كلمة كتبتيها
بس هاقولك حاجه ...
احنا ممكننبص للاصل ونتكلم
مش للفرع الاصل هى الدوله والاداره من فوق
مين بيوصل السجائر والمخدرات وغيرها ؟ والغرض ايه ؟
بصى للان مجتمعنا اليوم بقى طبقتين اتنين
1- الاغنياااااء اللى فوق اوى
2 - الفقراء ...
مافيش وسط
وده بسبب ان اهم هدف من اهداف الرأسماليه فى مصر والعالم فالكل بيتصارع منين نوصل لاعلى ربح وعلى حساب مين ؟؟
اظن انتى وصلتى للى انا عاوز اقوله
..
سلام
موضوعك رائع
FATHY

صفــــــاء يقول...

مساء الورد والفل على احلى أوراق ورد فى كل الدنيا
الأدمان
كلمه فــ سرك
مدمنه شيكولاته

لا بجد مناقشتك موضوعيه وطبعااا رقيقه زيك

وعشان خاطر الأدمان دة انتشرت السرقه عشان يجيبو فلوسه وانتشر حاجات أفظع لأن الشباب مش فى وعيهم

ربنا الحافظ

تحياتى وسلامى لك يا قمرايه

زهور الامل يقول...

ذو الوجه المبتسم

ازيك يا استاذ ناجي

ربنا يهدينا جميعا لما يحبه ويرضاه
اللهم امين

كل عام وانت بالف خير

منورني بوجودك

زهور الامل يقول...

الحزين

ازيك يا محمد
اخبارك ايه

ماهي الناس لجات للادمان علشان مش لاقية الحكومة اللي تهتم بيها وتشغلها
فبيضعفوا وبيقضوا على مشكلتهم بمشكله افظع وهي الامان

منورني يا باشا

زهور الامل يقول...

tweety

ازيك يا ايثار

عاملة ايه يا قمر

وحشاني خالص ومنورة المدونة والله

تحياتي يا جميل وشدي حيلك في المذاكرة
عايزين نمر عالية جدا السنادي باذن الله

زهور الامل يقول...

ameen

اهلا اهلا يا امين

انا كمان بحمد ربنا على المكان اللي انا فيه بالرغم من وجود هذه الظاهرة بكثرة عندنا بس برضو افضل بكثير من اماكن تانية كتير
على الاقل بلدي مفيش فيها ولا قهوة ولا كافي شوب وده شيء مهدي الموضوع ده عندنا شوية

ربنا يسترها علينا وعلى شباب الامة

منورني جدا يا امين وسعدت بمرورك الطيب

تحياتي

زهور الامل يقول...

المسلم الصغير

وعليكم السلام يا مسلم
انا الحمدلله تمام

انت اخبارك ايه
انت فعلا عندك حق

اذا كان اولى الامر منا بيتعاطوا المخدرات يبقوا هيحمونا ازاي وهيعدوا بينا ازاي مما نحن فيه

ربنا يسترها علينا جميعا

منورني دايما وبيسعدني وجودك

تحياتي

زهور الامل يقول...

مدحت محمد

الموضوع مابقاش في السويس بس يا مدحت ده بقى في جميع انحاء الجمهورية وبتطير فيه رقاب كتير

التجار بيتاجروا فيه علشان عايزين يكسبوا اكتر وعلشان البطالة اللي مالية الدنيا

والشباب بيتعاطوه من الفشل اللي هما عايشين فيه والانحلال اللي بقى مالي الدنيا
الله يرحمه الظابط اللي اتقتل ده ويلهم اهله الصبر والثبات

اسعدني مرورك الطيب

تحياتي

زهور الامل يقول...

ممكن

والله انت اللي رائع وجميل يا ممكن
متتخيلش انا فرحت قد ايه لما شوفت تعليقك
والله اتبسط اوي
ازيك
عامل ايه واخبارك ايه؟
انت فييييييييييين؟
انا قلقانة جدا

وحشتني اوي اوي
ياريت تطمني عليك علشان خاطري وبلاش طناشك ده

نيجي بقى لموضوع الادمان اللي انت علقت عليه بشكل رائع وكمان جبت فيه نقطة كويسة جدا وهي ان معظم الادباء والمفكرين والفنانين مدمنين والناس بيعتبروهم قدوة وهي دي المصيبة

او المصيبة مصيبتين
ان ناس بيوصوا شيء قيم للناس وفن وابداع مدمنين
والمصيبةالتانية انهم قدوة والناس بتقلدهم في كل حاجة
يعني ضياع يا مصر ضياع
ربنا يسترها علينا بجد ويخرجنا من الدنيا دي على خير

تحياتي يا اجمل ممكن في الدنيا
تحياتي

زهور الامل يقول...

ضحكات الحياه

ازيك يا قمر
عملت ايه في الامتحانات
ربنا ينجحك باذن الله ويوفقك

عندك حق فعلا الاسباب كتيييييير اوي والمصايب ذااااااادت اوي والحل بقى صعب برضو اوي

وزي ما قولت تعددت الاسباب والموت واحد

منورني جدا وياريت متغبش تاني كدة

تحياتي

زهور الامل يقول...

طهر فؤادك

ازي حضرتك

كل عام وانت بالف خير ومتشكرة اوي على الدعوة الحلوة دي وربنا يكرمنا جميعا

وان شاء الله هلبي الدعوة

منورني جدا

زهور الامل يقول...

حب الملائكة

ماهي الادارة اللي ربتدير البلد اللي مودية الناس في داهية من كل ناحية
مفيش شغل وبطالة واحباط وبيقتلوا الناس كمان بالسموم
لو الحكومة بتاعتنا منعت انشاء مصانع السجاير والخمور وشددت على عدم دخول الحاجات دي البلد مكنش ده بقى حالنا

معظم المسئولين كمان هما اللي بيتاجروا في الحاجات دي وكتير منهم بيتعاطوها

ربنا يخرجنا منها على خير
ويحمي شبابنا من وسائل الفساد والقتل دي

منورني جدا

زهور الامل يقول...

صفاء


مساء الهنا والسعادة على عيونك يا صفؤة

وحشااااني جدا جدا

ههههههههه تععرفي ان انا كمان مدمنة شيكولاته

بموت فيها

تقريبا هي الحاجة الحلوة اللي باكلها في حياتي
لاني ماليش في الحلويات خالص

نيجي بقى لادمان المخدرات
ادمان المخدرات بيؤدي تقريبا الى معظم الجرايم
السرقة علشان اجيب فلوس واشتري بيها
والاغتصاب والقتل لان الواحد بيبقى مش في وعيه وبيكون عصبي جدا وبيتهور لاقلل سبب
وحاجات تانيه كتير واهمها الفشل وتدمير الصحة والاحباط والضياع واللي بيشمل كل ده

منورااااااني جدا
وبيسعدني وجودك اوي

تحياتي

عمرو يقول...

بدايهـ اهنيكي ع الطرح الطييب

ديما تحمل مواضيعكـ كل ما هو قيمـ ومفيد

صراحهـ الموضوع دهـ كبير جدااا

ومحتاجـ مجهود كبير ف حلهـ ع المستوي الامني والاجتماعي

يشمل رصد المهربين ومعاقبتهمـ بأقصي العقوبات ، بالاضافة لحملات التوعيهـ ، وتوفير ميزانية للعلاج ومساندهـ هذه القضيهـ حتي حلها

اشكركـ سيدتي الفاضلهـ

دمتي مبدعهـ ،

خالص تحياتي ,,

micheal يقول...

في إنتظار جديدك
:)

كيكى عوووووو يقول...

يااااااااااه
الادمان علااجوا صعب اوى بكافه اشكالو بس محتاجين امل

نهر الحب يقول...

عارفة المشكلة ايه
ان الناس بيشوفوا وبيسكتوا ومحدش بقي بيتكلم في الموضوع او بيهربوا من الكلام عنه بدل ما يحاولوا يحلوه
وادمان الشباب للمخدرات في الجامعة بالذات بقي شيء عادي والمخدرات بقت زي السجاير

الحل ييجي من البيوت والتربية الصح
من جوانا احنا
لو انتظرنا حد يحل مشاكلنا يبقي مفيش فايدة

شكرا انك اثرتي الموضوع

العازمي يقول...

الادمان نهاية الهلاك اما بالموت او اختلال العقل ! ولكن هل التدوين ادمان ^_^

تحياتي .. العازمي

mimi يقول...

الفيديو والأغنية .. صوت حي لكل اللي كتبتيه

عندك حق في كلامك
وربنا يستر علي الجيل اللي جاي

بوست مفيد

تحياتي

سمكه واحده يقول...

كل سنه وانتي طيبه يازهور
اخبراتك ايه
وعامله ايه السقعه دي
انا بعلق وانا برتعش
وايدي علي الكي برود ساقعه

متلجه الجو برد عندنا هنا انتوا عندكوا ايه
بس بحب الاحساس ده
اما اقوو ياختي اجري ادفي تحت البطنيه بلا نت بلا وجع قلب بلا ميكانيكا فاضيه
مالها ايام زمان ايام الرديوا وام كلثوم واكل السوداني والدفا تحت البطينه والدفايا
بدل التكنولوجيا اللي هتكسحنا دي
سلام ياقمر

طهر فؤادك يقول...

شاركونى ياأحبائى فى حملة " اكفلة وهيدخلك الجنة " ,,,

إبتسامة ملاك يقول...

السلام عليكم


فينك ياقمر اخبارك اية يارب تكونى بخير
كل عام وانتى الى الله اقرب

شمس النهار يقول...

ازيك

موضوع المخدرات ده من زمااااااان الزمان


بس دلوقتي زاد وغطي جدا


ظهرت انواع جديده متطوره طبعا تمشيا مع العصر الحديث
والمشكله ان المجرمين
مستهدفين الشباب

والمفروض ان الحكومه مع الجمعيات الاهليه تتحد وتخلص علي الموضوع ده

عارفه الحل ايه

تحليل دم لكل مواطن عند استخراج اي فيش وتشبيه
استخراج رخسة قياده او تجديدها
عند دخول التجنيد او استخراج شهادة الاعفاء
عند الزواج(في بنات كتير بتفاجأ عند الزواج ان البيه مدمن)
في مواقع كتير جدا ممكن يتعمل فيها ده
وان شاء الله علشان الفائده تعم من البوست
هبقي اعمل بوست عندي
احط لينك بوستك ده مع الحلول اللتي لا ادعي تأليفها لأن اغلبها فعلا قائم في بعض الدول

بوست جميل فعلا

سلامي

Sharm يقول...

الادمان سببه الفراغ

هيثــم رمضـــان يقول...

إنتي فين يا زهور ,إن شاء الله تكوني بخير

تحياتي

mirooo يقول...

السلام عليكم
انا اول مرة ادخل عندك فى مدونتك الجميلة دى
مساء الورد والفل على احلى أوراق ورد فى كل الدنيا
يلا مش هاطول عليكى
سلام
mirooo

عفوا أنا أميرة يقول...

السلام عليكم ورحمة الله وبركاته
دى أول مره ليا فى مدونتك الجميلة ربنا يجعلها فى ميزان حسناتك
الموضوع دا فعلا انتشر بشكل كبير جدااا والأغرب بقى أن الموضوع دا بقى عادى جدااا بين الشباب يعنى الحشيش دلوقتى بقى زى السجاير العادية لا حول ولا قوة الا بالله العلى العظيم حضرتك ذكرتى أسباب كتير بس فى سبب مهم جدااا وهو أن النظام مابيبذلش أى مجهود للقضاء على ترويج المخدرات بل بالعكس بقى فى تسهيلات كتيره جدااا للحصول على المواد المخدره دى ربنا يصلح الأحوال ويهدى شبابنا وحكومتنا ويحفظنا من هذا الدمار
جزاك الله خيرا